Atzo bilera egin zuten Osakidetzako zuzendaritzak eta osasun sistema publikoko sindikatuek. Osasun erakundearen arduradunek sindikatuei iragarri zieten lehen arretako zerbitzuan murrizketak egingo dituztela udako opor garaian.
Hainbat barrutitan nabarituko da horren eragina eta eskualdeko kasuan bost zentrotan islatuko da:
- Okondo: uztailaren 24an eta abuztuaren 14an eta 16an itxita.
- Artziniega: uztailaren 17tik 28ra bitartean eta irailaren 11tik 15era itxita. Astearteetan eta ostegunetan baino ez dute zerbitzurik emango, 08:00etatik 12:00ak arte.
- Arespalditza: ekainaren 5etik 21era bitartean itxita eta uztailean eta abuztuan astearteetan eta ostegunetan itxiko dute 08:00etatik 11:00ak arte.
- Luiaondo: uztailaren 10etik 14ra bitartean eta abuztuaren 16tik 31ra itxiko dute astelehenetan, asteazkenetan eta ostiraletan. Zerbitzua emango dute astearteetan eta ostegunetan 08:00etatik 11:00ak arte.
- Laudio: uztailaren 19tik irailaren 15era 08:00etatik 17:00ak arte baino ez dute irekiko, hau da, zerbitzua hiru ordu murriztuko dute.
Eragina oso bestelakoa izango da herriz herri, baina nabarmena guztietan. Horrez gain, gogoratu beharra dago larrialdietan ere arazoak egon direla azken hilabeteetan eta erizainak egon direla zerbitzu hori eskaintzen, medikuen ordez.