Arabako Foru Aldundiak jakinarazi du 90.000 euro bideratuko dituela Erretes Tudelako eta Garrastatxuko baselizen mantenurako. Hain zuzen, Erretes Tudelako San Roke ermitan helburua da teilatua zaharberritzea. Artziniegako Udalaren aurrekontua 93.376,17 eurokoa da eta foru erakundeak 60.000 euroko gehieneko laguntza proposatu du.
Bestalde, Garrastatxuko Pietateko Andra Mariko ermitan, Baranbion, xedea da teilak aldatzea. Baranbioko Administrazio Batzarraren aurrekontua 49.231,12 eurokoa da eta dirulaguntza, aldiz, 33.477,16 eurokoa.
Arabako Foru Aldundiak tokiko erakundeekin elkarlanean egiten ditu esku hartze hauek eta iaz arazoak egon ziren Erretes Tudelaren kasuan.
Izan ere, Joseba Vivanco alkateak sare sozialetan salatu zuen 21.240,64 euro esleitu zizkietela, "partidako aurrekontu agorpenagatik", nahiz eta ebazpenean 67.230,84€ aitortu. Hortaz, obrak egin gabe utzi zituzten, diru nahikorik ez zegoelako.
Nabarmentzekoa da tokiko erakundeek ezinbestekotzat jotzen dituztela zaharberritze hauek, utzikeriak ondare historikoa eramatea erraztu baitie lapurrei, Erretes Tudelan bereziki.