Azaroaren 27ra atzeratu dute gaur egitekoa zen Tuabecexeko grebagatik auzipetutako hiru gazteen epaiketa. Dozena bat ertzain inguru zeuden deituak lekuko moduan deklaratzera, baina lehen biak ez dira agertu eta, ondorioz, bertan utzi dute epaiketa, bi lekuko horiek funtsezkoak direla ebatzi duelako epaileak. Antza, ertzain horietako batek grabatu zituen egun horretan poliziak eginiko irudiak, eta hori dela eta eman behar zuen lekukotza.
Epaitegian azaldu dutenez, administrazio hutsegite baten ondorioz gertatu da atzerapena. Antza, bi poliziei ez zaie lekuko moduan deklaratzeko jakinarazpena garaiz iritsi.
Dozenaka lagun bildu dira 8:30ak aldera Gasteizko Epaitegien aurrean, auzipetuei elkartasuna adierazteko. Tubacexeko langileez gain, hainbat herritar bertaratu dira protestara. Poliziaren presentzia handia ere egon da, brigada mugikorraren lau furgoneta bertaratu baitira.
4 urteko eta 7 hilabeteko kartzela zigorra eskatzen diete auzipetutako hiru gazteetako bakoitzari, Tubacexeko greba mugagabearen 43. egunean Saratxoko piketean jazotako gertakariengatik.
Urriaren 11n, aldiz, Tubacexeko greban atxilotutako lehen bi langileak epaituko dituzte. 14 hilabeteko kartzela zigorra eskatzen dute bakoitzarentzat, desordena publikoak eta agintarintzaren aurkako atentatua egotzita.
