Marka esanguratsuak lortu dituzte Arrietta Ruiz Goiri orozkoarrak eta Maialen Lazkano Ugarte aiararrak Espainiako zein Euskadiko hipika txapelketetan. Lehena abuztuaren 29tik irailaren 3ra bitartean jokatu zen Madrilgo Campo Villa klubean, eta Infantil kategorian lehiatu ziren bi aiaraldearrak bertan.
Lazkanok 8. postua lortu zuen eta Ruiz 18. geratu zen. Bi markak nabarmentzeko modukoak direla adierazi du euren entrenatzaileak, Andoni Fuentes Unzagak. “44 pertsonek hartu zuten parte guztira eta maila geroz eta altuagoa da. Lazkano, gainera, Euskadiko onena izan zen proban”, nabarmendu du.
Lazkano Euskadiko txapeldun
Irailaren 16 eta 17an, aldiz, Getxoko Galea klubera bertaratu ziren bi gazteak, Aizene Bengoetxea Polorekin batera, Euskadiko hezte klasikoko txapelketan aritzeko.
Bertan ere eman zuten zeresana Aiaraldeko kirolariek. Lazkano lehena geratu zen lehen eguneko proban, eta bigarren, aldiz, biharamunekoan. Modu horretan, txapeldun gisa sailkatu zen Infantil kategorian. Arrieta, bere aldetik, 2. postuan geratu zen bigarren eguneko proban.
Andoni Fuentes Unzaga pozik azaldu da kirolarien emaitzekin. “Pozik gaude lortutako markarekin eta Aiaraldetik lehiaketari maila eman ahal izatearekin”, nabarmendu du.
Okondoko hipodromoan entrenatzen dute kirolari gazteek, duela 5 urtetik. “Hastapenetatik txapelketa mailara arteko ikasketa prozesua eskaintzen dugu, ikasle zein zaldientzat, hezte klasikoko diziplinan”.
Beste lorpen batzuk ere erdietsi dituzte Aiaraldeko gazteek azken urteetan. Arrietta Ruiz Goirik, adibidez, hezte klasiko zilarrezko domina eskuratu zuen iaz Espainiako Txapelketan.