Urriaren 11n bi gizonezko atxilotu zituen Ertzaintzak Orozkon eta Amurrion, kalamuaren hazte eta salerosketari lotuta. Osasun publikoaren kontrako delituak leporatu zizkien eta, epaitegitik igaro ostean, aske geratu dira kautelazko neurriekin.
Operazioaren sorburua Amurrion irailean egindako beste bat izan da. Horretan gizonezko bat epaitegira eraman zuten eta beste bat ere akusatu zuten. Ikerketa horietan lortutako informazioa baliatu zuen poliziak urriaren 11n Orozkoko baserri batera jotzeko.
Han, antza, bideozaintza- eta aireztapen-sistemak zituen negutegia aurkitu zuten, baita laborategi gisa erabiltzen ziren eta marihuana-usain handia zerien bi lanabes-etxola ere.
Etxola horietan, marihuana-poltsaz betetako hozkailu-kutxa bat, haxix polena erauzteko hiru zentrifugagailu eta tablet bihurtzeko edo zukua edo "rosina" ateratzeko farmazia-erabilerako liofilizagailu bat aurkitu zituzten, baita prozesu horietan beharrezkoa den labe-papera ere.
Baserriko jabea atxilotua
Higiezineko jabea agertu zenean, poliziei azaldu zien lursailak beste pertsona bati alokatzen zizkiola. Hala ere, baserri barruan marihuana indoor landaketa bat (hau da, lokal batean), ongarriak eta laborantzarako aparatuak ere aurkitu zituzten.
Landaketarekin batera, lehortze-fasean zeuden 738 landare ebaki, marihuana-kukuluak, eta bi izozkailuren barruan haxix hautsa zuten poteak eta zortzi marihuana poltsa aurkitu zituzten.
Ondorioz, Ertzaintzak gizonezkoa atxilotu zuen osasun publikoaren kontrako delitua leporatuta.
Beste miaketa eta atxiloketa bana
Egun berean, agenteak Amurriora joan ziren, ustez Orozkoko lurrak erabiltzen zituen pertsonaren etxera. Gizon horrek bere etxe barrura eraman zituen poliziak, eta 490 landare eme zituzten bi indoor landaketa agertu ziren.
Etxebizitza miatzean, 40 eta 90 zentimetro arteko luzera zuten 225 marihuana-landare, 17 marihuana-poltsa, mila hazi baino gehiago eta horiek indibidualizatzeko ontziak, rosina egiteko prentsa bat, landare emeak ongarritzeko izoztutako lore "arrak" zituzten bost ontzi, produktu fitosanitarioak eta barruan hazteko tresnak aurkitu zituzten.
Erregistroan, halaber, errosinarekin egindako 12 flasko aurkitu ziren, tetrahidrocannabinol kontzentrazioarekin. Produktu horretan kanabisaren osagai psikoaktiboa % 60tik gorakoa da, eta osasunarentzat arriskutsua izan daiteke, Ertzaintzaren aburuz.
Gizonezko hau ere osasun publikoaren aurkako beste delitu batengatik atxilotu zuten.