Ezohiko bilkura egin zuten atzo Ibaizabal-Nerbioi Mankomunitatea osatzen duten bederatzi udalerrietako ordezkariek, tartean Urduña, Orozko, Arakaldo eta Arrankudiaga-Zolloko ordezkari politikoak ere. Maiatzeko Udal eta Foru hauteskundeek eskualdeko mapa politikoa aldatu dute, eta horren isla mankomunitatera iritsi zen atzo.
Gauzak horrela, bere bigarren legealdiari ekin dio erakundeak. Atzoko bilkuran mankomunitateko lehendakaria hautatu zuten bederatzi udalerrietako ordezkariek. Orain arte lehendakari izandako Miguel Angel Herro izendatu zuten berriro ere lehendakari aho batez. Txutxi Ariznabarreta Arrankudiaga-Zolloko alkateak Herrok azken urteetan mankomunitatearen eraketan egindako lana jarri zuen balioan, eta bide horretan jarraitzeko "hautagairik egokiena" dela adostu zuten guztien artean.
Lehendakariordea izendatzea falta da orain, baina Herrok bere hitzartzean aurreratu zuenez, abendu hasieran egingo duten lehenengo Osoko Bilkuran adostuko dute ardura hori.
Erronka berriak bigarren legealdian
2021eko maiatzaren 13an sortu zen Nerbioi-Ibaizabal Mankomunitatea, ordura arte Udaltalde 21 erakundeak abiatutako bideari segida emateko asmoz.
Guztira bederatzi udalerrik osatzen dute mankomunitatea, tartean Aiaraldeko lau udalerri: Urduña, Orozko, Arakaldo, Arrankudiaga-Zollo, Zeberio, Ugao-Miraballes, Arrigorriaga, Zaratamo eta Etxebarri.
Lehenengo legealdian jasangarritasun politikez eta hondakinen kudeaketaz arduratu da nagusiki mankomunitatea, baina bigarren legealdi honetan erronka berriak esleitu nahi dizkiote bere buruari. "Zerbitzu berriak konpartitzeko erronka dugu legealdi berri honetan, gizarte zerbitzuak besteak beste", azaldu zuen Ariznabarretak Arrigorriagako udaletxean izandako osoko Bilkuran.
