Erritmoa azkartzeari ekin dio Aiaraldeko Mugimendu Feministak azaroaren 30erako Hego Euskal Herri osoan deitua dagoen greba orokor feministari begira. Horri lotuta, urrats esanguratsua eman zuen igandean, eskualdeko agerraldia egin baitzuen Artziniegan.
Hainbat eragile, sektore eta mugimenduetako dozenaka kide bildu ziren Toñin Luengas frontoian. Greba egiteko arrazoiak aletu zituzten, irakurketa zabal bat plazaratuta. "Ez da unean uneko zerbait, zaintza bizitzako une eta eremu guztietan beharrezkoa da", nabarmendu zuten, "gure gorputzen, komunitateen eta lurraren iraunkortasunerako ezinbestekoa da; hau da, bizitza, ongizatea eta osasuna iraunaraztekoeta kudeatzeko beharrezkoa".
Baina Euskal Herrian zaintzarako zerbitzuak "geroz eta pribatizatuago" daudela salatu zuten jarraian, "enpresa lagunen eskuetan jartzeko eta horietatik milioi askotako etekinak ateratzeko, zaintzaren kalitatearen eta langileen lan-baldintzen kontura".
Horretarako "familia heteropatriarkala erdigunean" jartzen dela nabarmendu zuten eta, ondorioz, zaintza lanak emakumeen gain geratzen direla, "eta sarritan emakume migratu arrazializatuetan". Horregatik, Aiaraldeko Mugimendu Feministako kideek uste dute egungo sistema "arrazista" ere badela, "kapitalista eta heteropatriarkala" izateaz gain.
Guztira, 23 eskakizun zehatz plazaratu dituzte, hainbat gairi lotutakoak: erroldatzeko eskubidea, arrazakeria instituzionala, gizonei egin beharreko interpelazioa, agroekologia, etxebizitza, zaintzaileentzako laguntza sareak, etxeko langileen lan baldintzak, zaintza sistema publikoa indartzea eta abar luze bat.
Herri akordioa
Aipatutako guztiaren aurrean, "zaintzarako eskubide kolektiboaren aldeko apustua" aldarrikatu zuten feministek, eta horri begirako tresna moduan jarri dute grebarekin sustatu nahi den Herri akordioa, "mugimendu sozial eta sindikalekin batera adostutakoa".
Akordio horretan momentuz bildu dituzten aldarriak ere aletu zituzten igandeko agerraldian. Bi multzotan banatu zituzten exigentziak, epe laburrera begirakoa alde batetik, epe luzera begirakoak bestetik. Guztira, 23 eskakizun zehatz plazaratu dituzte, hainbat gairi lotutakoak: erroldatzeko eskubidea, arrazakeria instituzionala, gizonei egin beharreko interpelazioa, agroekologia, etxebizitza, zaintzaileentzako laguntza sareak, etxeko langileen lan baldintzak, zaintza sistema publikoa indartzea eta abar luze bat.
Bukatzeko zaintzarekiko "konpromisoak nahiz erantzunkizunak" hartzeko beharra jarri zuten mahai gainean igandeko agerraldian, "lanaren banaketa sexual eta arrazista" desegiteko. Horri begirako urrats moduan kokatu zuten azaroaren 30ko greba feminista orokorra, "denon bizitza erdigunean jartzeko prozesua" izango dela nabarmenduta.