Gaur epaituko dute Raquel Rodriguez, Cadizeko metalgintzaren sektoreko grebagatik auziperatutako langilea. Tubacexeko LABeko sail sindikalak oharra plazaratu du beharginari elkartasuna adierazi eta bere "berehalako absoluzioa" exigitzeko. "Raquel duintasun eta borroka eredua da langile klase osoarentzat eta horregatik jarraituko dugu bera sutsuki defendatzen", aldarrikatu du sindikatuak.
LABeko kideek gogorarazi dute Rodriguez komunikabideetan agertu zela indar polizialei aurre egiteagatik. "Une horietan egikaritzen ari ziren militarizazioa eta errepresioa gelditzeko eskatu zien. Horren ondorioz, hainbat delitu egotzi zizkioten, eta isun bat ordaintzera zigortu".
Fiskaltzak akordioa eskaini zion langileari, egozten zitzaiona onartzearen baldintzapean. "Raquelek uko egin zion horri eta, errepresalia moduan, berriro akusatu zuten, bere zigorraren zenbatekoa are gehiago igoz".
Horren aurrean, Raquel "errugabea" dela nabarmendu dute LABeko kideek, "langile klasearen mobilizazioen aurkako estatuaren errepresio makinariaren beste biktima bat" dela iritzita.
Aldebiko elkartasuna
Honakoa ez da Tubacexeko langileen eta Cadizeko metaleko langileen artean dagoen lehen elkartasun keinua. 2021ko azaroaren 25ean, Tubacexeko greba mugagabea amaitu eta aste batzuetara, bertako zenbait langilek Andaluziaraino bidaiatu zuten, grebalariei 5.000 euroko dohaintza egiteko.
Iragan ekainean, aldiz, Cadizeko bi langilek Gasteizera bidaiatu zuten, Tubacexeko auziperatuei elkartasuna adierazteko epaitegiaren aurrean: