Hamabost egun baino gutxiago geratzen dira Euskal Herriko Mugimendu Feministak eta gehiengo sindikalak deitutako Greba Feminista Orokorrerako. Aiaraldean ere azaroaren 30erako motorrak berotzen jarraitzen du Aiaraldeko Greba Batzordeak.
Hain zuzen ere, greba deialdiaren nondik norakoak aletzen dituen bideoa plazaratu berri du Aiaraldeko Mugimendu Feministarekin batera tokiko greba deialdiaren antolakuntzaz arduratzen ari den batzorde herritarrak. Greba Feminista Orokorreko aldarri nagusiak mahaigaineratu eta greba eguneko nolakotasunak azaltzen ditu ikus-entzunezkoak; ohiko produkzio greba ez ezik, kontsumo greba ere badela azalduta.
Aiaraldeko Greba Batzordeak zaintza grebaren garrantzian ere egin du azpimarra. Zentzu horretan, "gizonek ardura berezia hartu beharko dutela" nabarmendu du. Gizonen lana "piketeen lehen lerroan egotea baino, zaintzaren ardura haien gain hartzea" izango dela adierazi dute. Zaintzari begira, gainera, zaintza guneak atonduko dituzte azaroaren 30eko greban Aiaraldeko herrietan, "pertsona orok greban parte hartzeko eskubidea izan dezan".
Grebarako eskubidea
Grebarako eskubidea herritar ororena dela aldarrikatu du Aiaraldeko Greba Batzordeak, hots, ez dela zertan sindikatu bateko afiliatua izan behar greba deialdian parte-hartzeko.
Greba Batzordeko kideak, ordea, kontziente dira pertsona orok ez dituela greba egiteko erraztasun berdinak; "zaintza sektoreko langileen artean bereziki". Horregatik, telefono zenbakia (645 96 59 20) eta helbide elektronikoa (aiaraldekogrebabatzordea@gmail.com) jarri dituzte herritarren eskura; greba deialdiaren inguruko zalantzak edota arazoak bideratzeko asmoarekin.
Eskualdeko agerraldia igandean
Greba deialdia indartzeko asmoarekin, agerraldia egingo du igande honetan Aiaraldeko Greba Batzordeak. Urduñako Gernika plazan jarri dute hitzordua, 12:30ean. Eskualdeko eragile, enpresa-batzorde zein norbanako orori luzatu diote bertaratzeko deia, "laneko arropak soinean jantzita".
Aurreko egunean, ordea, Amurrioko Emakumeen Sareak eta Aiaraldeko Mugimendu Feministak Zaintzen Foroaren II. edizioa egingo dute Amurrio Antzokian. Bertan, "Euskal Zaintza-Sistema Publiko eta Komunitarioaren beharraz" hausnartuko dute, greba deialdiko aldarri nagusietako bat dena.
