"Aiaraldeko kaleak hartzeko" aldarri ozena zabaldu dute gaur Airaldeko Greba Batzordeak eta Mugimendu Feministak Urduñako Gernika plazan egindako agerraldian. Zaintza sektoreko langileen, eskualdeko enpresa batzordeen eta eragile sozialen ordezkaritza zabal batek babestu du deialdia.
"Zaintza zerbitzuen pribatizazio prozesuaren ondorioz, ez dago zaintza baliabide nahikorik eta zaintzaileen egoera prekarioak ere gurutzatzen du gure eskualdea"
"Zaintza krisiaren aurrean, zaintza eskubide kolektiboaren alde" azaroaren 30eko Greba Feminista Orokorrera batzeko deia luzatu diete Aiaraldeko bizilagunei, greba deialdiak "herritar oro interpelatzen duela" azpimarratuta.
Aiaraldeak pairatzen duen zaintza sistema desorekatuaren ondorioetan jarri dute azpimarra: "zaintza zerbitzuen pribatizazio prozesuaren ondorioz ez daude zaintza baliabide nahikorik eta zaintzaileen egoera prekarioak ere gurutzatzen du gure eskualdea".
Orozkoko Madres Mercedarias egoitzaren egoera, zahar-egoitza pribatuetako beharginen lan-hitzarmen gabezia edota etxez etxeko zaintza langile egoiliarren "miseria" egoera jarri dituzte, besteak beste, "zaintza krisi" horrek Aiaraldean duen eraginaren adibide.
Aiaraldeko Greba Batzordeak bideo batean aletu zituen iragan astean greba deialdiko arrazoi nagusiak:
Grebako hitzordu nagusiak
Azaroaren 30eko deialdiko zita nagusiak zabaltzeko baliatu dute gaur Urduñan burututako agerraldia. Egun horretan 5:00etan abiatuko dituzte lehenengo piketeak Amurrion eta Laudion. Horretarako, Telefonikan eta Latiorroko aparkalekuan jarri dituzte, hurrenez hurren, bertaratzeko hitzorduak.
Industriagune eta enpresa nagusietan pikete informatiboak egin ostean, goizeko lehenengo mobilizazioak egingo dituzte hainbat herritan. Hain zuzen ere, Amurrion, Urduñan eta Laudion aterako dira kalera, 11:45ean. Mobilizazio hauekin greba deialdira batzeko zailtasunak dituzten zaintza sektoreko langileei eman nahi diete ikusgarritasuna, greba feministako deitzaileek azaldu dutenez.
Azkenik, eskualdeko manifestazioarekin bukatuko dute eguna. Laudion izango da eguneko mobilizazio nagusia, eta Herriko plazatik abiatuko da 18:00etan.
Greba deialdira batu diren eskualdeko enpresa batzordeen zerrenda ere egin dute publiko:
- Artiach
- Amurrioko Udala
- BM Amurrio-Laudio
- Laudioko Udala
- Tubos Reunidos
- Maderas de Llodio
- Jez, Envases
- Amurrio Ferrocarril
- Tubacex
- Aiala Vidrio
- Vidrala
- Guardian
- Glavista
- Inauxa
- Aliaxis
- Aresketa Ikastola
- Laudio ikastola
- Lamuzako Guraso Elkartea
- Madres Mercedarias
- Aiarako Kuadrilla
- Orozkoko Udala
- Laudioko Euskaltegia
- SAD urduña
- Urduñako Arkupe erresidentzia munizipala
- Amurrioko Bañueta kiroldegia
- Aiaraldeko Jantokiak (eskola pubikoetako zerbitzua)
- Enviser (Laudioko garbikuntza)
- Garnica (Tubacex garbiketa)
- Megatech (LABeko atala)
Kaleak astintzeko deia
Hamaika egun geratzen dira Greba Orokor Feministarako eta gaurdanik Aiaraldeko kaleak astintzeko deia zabaldu dute Greba Batzordeak eta Mugimendu Feministak: "Hurrengo egunetan, azaroaren 30era arte dauden asanblada, propaganda banaketa edo bestelako ekimenetan parte-hartzeko deia egiten dugu".
Baina ez dute orain arteko "prozesuaren potentzialtasuna" azaroaren 30era mugatu nahi, eta grebaz harago ere "zaintzen egungo antolamendu soziala eraldatzeko" nahia eta beharra adierazi dute: "Azaroaren 30etik aurrera ere, zaintza lanak demokratizatzera bidean urratsak ematen jarraitu behar dugu, herri akordio zabalen bidez".