Urbide Arabako Ur Partzuergoak bere ordezkariak berritu ditu, udal hauteskundeen ondorioz. Azaroaren 27an egin zituzten izendapenak eta Julen Ibarrola Izoriako Administrazio Batzarreko presidentea eta abeltzaina egongo da instituzioaren buruan. Amaia Barredo Jasangarritasun, Nekazaritza eta Natura Ingurunearen foru-diputatua, aldiz, presidenteordea izango da.
Arabako tokiko 108 erakundek osatzen dute Urbide: 14 udalek, 93 kontzejuk eta Arabako Foru Aldundiak. Partzuergoaren helburua da lurralde historikoaren ur edangarriaren ziklo osoa kudeatzea, biltzea eta hornitzea barne.
Erakundearen helburu nagusietako bat izango da Europako Araudia betetzea. Izan ere, etorkizunean uraren kostuak bere kudeaketa osoaren faktura osoa ordaindu beharko du, ez gaur egun bezala, orain udalek euren gain hartzen baitute gastuaren zati bat.
Urbide osatzeko Kantauriko Urkidetza desegin zen eta prozesuak eztabaida politikoa ekarri zuen. Esaterako, Artziniegako Udalak erabakia atzeratu zuen, ez zegoelako ados jarraitutako bidearekin.