Euskal Autonomia Erkidegoko Auzitegi Nagusiak berretsi du Gasteizko Lan-arloko 3 zk.ko Epaitegiak irailean erabakitakoa. Orduko hartan, Ignacio Sanchez Moran epaileak adierazi zuen Tubacex enpresak langile baten oinarrizko giza eskubideak urratu zituela. Hori, aldi berean, genero diskriminazioan oinarritu zen, emakumezkoak bere lanaldia erdira murriztu baitzuen hiru seme-alabak zaintzeko.
Diskriminazioa, zehazki, 2021eko azaroaren eta 2022ko martxoaren bitartean indarrean egondako enplegua aldi baterako erregulatzeko espedientean gertatu zen. Tarte horretan, emakumezkoak %49,45ra murriztu behar izan zuen bere jarduera enpresan. Aldiz, bere kategoria bereko lankideek zegokien %83,38a lan egin zuten.
Emakumeak bere lanaldia %49,45ra murriztu zuen 2021eko azaroaren eta 2022ko martxoaren artean, enplegua aldi baterako erregulatzeko espedientearen ondorioz. Bere lankideek, ordea, %83,38ko lanaldiak izan zituzten tarte berean.
Epailearentzat argi zegoen ezberdintasun horren sorburua zela salatzailearen zaintzagatiko lanaldi murrizketa, eta Tubacexeko zuzendaritzak baliatutako argudio guztiak deuseztatu zituen. Hain zuzen, epailearen aburuz, enpresak ez zuen frogatu langileak gaitasun gutxiago izatea lanposturako edota bere txandan (goizekoan) eragin handiagoa izana murrizketa neurriek. Gainera, epaileak adierazi zuen enpresak ez zituela neurriak hartu balizko bi egoera horiek zuzentzeko.
Horren guztiaren ondorioz, Ignacio Sanchez Moran epaileak azaldu zuen genero diskriminazioa egon zela emakumearen kontra eta, ondorioz, nulu bilakatu zuen enpresaren erabakia. Horrez gain, 13.130,65 euroko kalte ordainak ezarri zizkion enpresari.
LABen ustez, praktika sistematikoa
LABek adierazpena zabaldu du epaiaren balorazioa egiteko, sindikatuko kidea baita epaiketa irabazi duen langilea. Oharrean azpimarratu dutenez, praktika hori ohikoa izan da Tubacexen zaintzagatiko murrizketak hartu dituzten beharginen aurka.
Halaber, sindikatuak iritzi du tamalgarria dela jokaera hori duen konpainiak Eusko Jaurlaritzaren dirulaguntzak izatea.
Egoera orokorrari erreparatuta, LABek salatu du industriaren esparruan ohiko egoera dela genero diskriminazioarena eta zaintza lanak maiz oztopatzen direla.
Hori guztia salatu zuten 2021ko martxoaren 8an Tubacexen bertan eginiko pikete feministan, Tubacexeko greba mugagabearen testuinguruan:
