Arabako Batzar Nagusietako EH Bildu eta Elkarrekin taldeetako ordezkariek testua aurkeztu dute, Foru Aldundiak autobus zerbitzua sortu dezan. Zerbitzu horrek Urduña-Amurrio-Laudio-Galdakaoko Ospitalea ibilbidea beteko luke eta ahalik eta azkarren abiatzea exijitu dute, aiaraldearrek joateko eta itzultzeko aukera izan dezaten.
Honakoa argudiatu dute bi erakunde politikoek: "Bizkaibusek eskaintzen duen linea eskualdeko herri guztietatik eta Bizkaiko beste batzuetatik igarotzen da, hala nola Arrigorriaga, Basauri eta Galdakaotik. Horren ondorioz, erabiltzaileek denbora asko eman behar izaten dute ibilbidean".
Hori dela eta, ezinbestekotzat jo dute zerbitzu zuzena eskaintzea: "Emandako denboraz gain, ospitalera joan beharrak beste aukera edo bitarteko propio batzuk bilatzera eramaten ditu, hala nola ibilgailu pribatua. Elkarrekin eta EH Bilduren ustez, horrek trafikoa areagotzea, istripuak izateko arrisku handiagoa, ospitalean aparkatzeko zailtasunak edo energiaren kontsumoa handitzea eragin dezake".
Parte hartzea
Oposizioko taldeek adierazi dute Arabako Foru Aldundiak sei hilabeteetan egin beharko lukeela plan bat eta, tarte horretan, Aiarako Kuadrillarekin, Urduña, Amurrio eta Laudioko Udalekin eta Arabako Batzar Nagusiekin partekatu, herritarren parte hartzea ahalbidetzeko.
EH Bildu eta Elkarrekinen eskaera ez da ezerezetik sortu. Aiaraldeko pentsiodunek urte hasieran abiatu zuten aldarri bera jendarteratzeko kanpaina, eta mozioak aurkeztu zituzten eskualdeko udaletxeetan.