Sahararen aldeko elikagai bilketa egingo dute asteburuan Aiaraldeko hainbat txokotan

Erredakzioa 2024ko urtarrilaren 25a
Deskargatu Info Ahotsak :

Iaz Laudiotik atera zen elkartasun karabana. / Aiaraldea.eus

Ostiral eta larunbatean egongo dira Sahararen aldeko ekintzaileak Laudio eta Amurrioko Eroskiren saltokietan. Horrez gain, Artziniegako UNIDE supermerkatuan ere jasotzen ari dira elikagaiak.

Abian dago Sahararen aldeko elkartasun kanpaina. Saharako Errepublika Arabiar Demokratikoko Lagunen Elkarteko kideak Laudio eta Amurrioko Eroskiren saltokietan egongo dira bihar eta etzi, oinarrizko produktuak jasotzen: lekaleak, azukrea, pasta, hegaluze eta sardina latak, arroza eta konpresak.

Horrez gain, dohaintza ekonomikoak egiteko kontu korrontea ere jarri dute nahi duen ororen eskura: ES79 3035 0089 1608 9104 1001.

Artziniegan ere

Artziniegan ere egongo da elkartasun kanpainan parte hartzeko aukera. Zehazki, UNIDE supermerkatuan utzi ahalko dira elikagaiak.

Antolatzaileek espero dute 80-100 tona artean biltzea guztira otsailaren hasierarako. Donostiatik abiatuko da euskal karabana Aljeriako errefuxiatuen kanpalekuetarantz. Iaz Laudiotik atera zen karabana.

Ekimenaren antolatzaileek Aiaraldeko herritar guztiei luzatu diete ekarpena egiteko gonbita, eta espero dute bilketak “ohikoan duen harrera beroa” izatea aurten ere.

Jendartea

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide