EH Bildu Arabak mozioa aurkeztuko du eskualdeko udaletan, Arabako Foru Aldundiari eta Eusko Jaurlaritzari exijitzeko Aiaraldeko Plan Estrategikorako talde eragilea deitzea, plan estrategikoa behingoz adostu eta onartzeko.
Izan ere, koalizioak honakoa salatu du prentsa ohar bidez: "Duela ia urte bat Aiaraldeako alkate guztien aurrean eskualdeko plan estrategikoaren hasierako zirriborroa aurkeztu zen. Baina horren ostean ez dute berririk jaso. Hori bai, EH Bilduk Arabako Batzar Nagusietan egindako galdera bati esker, badakigu zirriborro hori ez dela 'asko' moldatu".
"Helburuak ez dira bete"
EH Bilduk argudiatu du 2022-2023 tartean abiatu behar ziren 30 ekimenen artean %3,3 baino ez direla bete eta erakundeek bitartekoak jarri behar dituztela helburuak gauzatzeko.
Koalizioak azpimarratu du Aiaraldeko egoera sozioekonomikoari buruzko ponentzia 2018an hasi zirela lantzen Eusko Legebiltzarrean eta 2022an Plan Estrategikoa aurkeztu behar zutela. Hortaz, salatu dute ez direla epeak bete.
“Erabateko porrota”
Ildo horretatik, EH Bilduk hondamenditzat jo du arlo sozioekonomikoan egin den kudeaketa. Izan ere, funtsen erdia sustapen ekonomikora bideratu behar zuten eta proiektu nagusietako bat zen Laudio Glass Hub ekimena, udalerria beiraren erreferentea bilakatzea. "Aurkeztutako hiru proiektuetatik bi AutoGlass-Glavista enpresarenak ziren, eta biak daude jasotako funtsak itzultzeko prozesuan. Izan ere, utzikeriazko eta ekintzarik gabeko aldi horretan, enpresak ateak itxi eta bere 240 langileak kaleratu ditu" adierazi du EH Bilduk.