Mugimendu Feministatik zaintzaren negozioa salatzen den garaietan ("haceros cargo ya" mezu zuzenarekin gainera) aldamenetik aldaketak baino, "zorionak" jasotzen ditugu. Zaintzarekiko eta feminismoarekiko ardura jendarte osoarena da (edozein motatako norbanako zein entitateena: lantokiak, kirol zein kultur elkarteak, eragile politiko edota sindikalak, instituzioak, hezkuntza sistema...).
Bada garaia bakoitzak dagokion espazioa, hitza, posizioa eta boterea hartu (edo utzi) dezan: etxe zein zaintza sistemako langileek (soldatapekoek zein lan horiek egiten dituztenek) bestelako baldintza batzuetan egin dezaten edo dezagun aurrera. "Zorionak esaten badizute gaur, ez da bere tokia" irakurri dut sare sozialetan.
Gogoan izan ditzagun gaurko, biharko eta urte osoko egunetan 24 orduz zaintza lanetan dabiltzan emakumeak* zergatik dauden (eta gauden) horrela, eta eralda ditzagun orainetik sistemaren erroak (gure etxekoak, hezkuntzakoak, lan mundukoak, instituzioetakoak...). Gaur eta behar besteetan aterako gara kalera.
M8 egunero da. Ohartzen zarenerako, bai, zorionak.