Aiarako Kuadrillak onartu berri ditu 2024ko aurrekontuak eta diru kopurua nabarmen handitu da. Guztira, 8.152.138,23 euroko gastua aurreikusi dute, hau da, iaz baino %54 gehiago.
Goranzko joera hori azaltzeko hiru egitasmo hartu behar dira aintzat. Alde batetik, eztabaida prozesu luzearen ondoren, Arespalditzako Aiarako Kuadrillako egoitza berritzeari ekingo diote eta horretarako 1.603.584 euroko inbertsioa egin beharko dute. Esku-hartze hori ia osorik ordainduko du Arabako Foru Aldundiak finantzaketaren %90 bere gain hartuta.
Hiri-hondakin solidoen bilketa: 3.400.000 euro
Dena den, hiri-hondakin solidoen eskutik helduko da gastu handiena. Berez, aurten kontratu berria esleituko dute eta horretarako 3.400.000 euro baliatuko ditu Laudio, Amurrio, Okondo, Aiara eta Artziniega barne biltzen dituen erakundeak. Kasu honetan, dena den, ez du dirulaguntzarik jasoko.
Eskualdeko Enplegu Plana
Beste xede estrategikoa enpleguari bultzada ematea izango da. 1.000.000 euroko partida erabiliko dute horretarako. Kopuru horretatik, 400.000 euroko ekarpena egin du Eusko Jaurlaritzak eta bestea Udalen ardura izango da.
Bide beretik, Arabako Foru Aldundiak trebakuntza programa (40.000 euro) eta ekintzailetza programa (25.000 euro) ordainduko ditu.
Antzeko helburua izango du turismoa bultzatzeko ekimenak ere. 173.500 euro bideratuko dute horretara, Eusko Jaurlaritzaren, Arabako Foru Aldundiaren eta Vital Fundazioaren babesarekin.
Gazteak eta ohiko egitasmoak
Aurtengo berritasun gisa, Encina Castresana Kuadrillako presidenteak azaldu du gazteei buruzko diagnostikoa osatuko dutela Eusko Jaurlaritzaren dirulaguntzari esker.
Horrez gain, ohiko jarduerak mantenduko dituztela gaineratu du Kuadrillako buruak: adinekoen eta emakumeen topaketak, eskualdeko erakusleihoen lehiaketa, Aiarako Bira, sentsibilizazio kanpainak...