Aiaraldeko Mendiak Bizirik! plataformak jarraitzen du bere jarduerarekin eta alegazioak idatzi eta partekatu ditu Ferosca deituriko azpiegitura eolikoaren aurka.
Zehazki, Ferosca Wind SL enpresak 200 metroko sei aerosorgailu kokatu nahi ditu Pagolar mendian eta inguruetan. Plataformak adierazi du horrek kalteak sortuko dituela Aiaran, Laudion eta Okondon eta horregatik zabaldu du deia herritarren artean, prestatutako alegazioekin bat egin dezaten.
Enpresaren Ingurumen Inpaktuaren Azterketa eta proiektua
Aiaraldeko Mendiak Bizirik! taldeak adierazi duenez, konpainiak otsailaren 13an aurkeztu zuen Ingurumen Inpaktuaren Azterketa eta proiektua. Plataforma ez dator bat azterketaren edukiarekin, "ez baitira aztertu alegazioetan salatzen ditugun funtsezko alderdiak: zarata, aerosorgailuetatik 2 kilometroko distantziara bizi direnen osasuna, landa-udalerrietako ekonomian izan ditzakeen eraginak, datu meteorologiko fidagarririk eza, hirigintza- eta ingurumen-araudiak ez betetzea…".
Ingurumenaren defentsan aritzen den kolektiboak azpimarratu du enpresaren dokumentazioan proiektuaren inpaktuak sakon aztertuta egon beharko luketela eta, juridikoki, orain dela alegazioak aurkezteko aukera bakarra.
Horregatik, hain zuzen, helegiteak sortu dituzte eta hemen zein Zuhaitza liburudendan edo Mastercopyn (biak Laudion) eskuratu daitezke, baita aiaraldekomendiakbizirik@gmail.com helbidera idatzita. Hori bai, martxoaren 25ean beranduenez bidali behar dituzte herritarrek erakundeetara.
Horretarako bide anitzak daude:
- Udalen erregistroan, Eusko Jaurlaritzarekin duten hitzarmen baten bidez.
- Posta arruntaren bidez, Arabako Industria Administrazioaren lurralde-ordezkariari zuzendua.
- Sinadura elektronikoaren bidez, hemen.
- Egoitzan: Donostia-San Sebastian kalea 1, 01010 Gasteiz.
- Gaurko egunez konfirmatuta dauden hurrengo mendi taldeen egoitzetan: Goikogane (Laudio), Mendiko Lagunak (Amurio) eta Txarlazo (Urduña).
Informazio kanpaina
Aiaraldeko Mendiak Bizirik!-ek, gainera, informazio kanpaina abiatu du egun hauetan eta bi hitzaldi antolatu ditu: astearte honetan 18:30ean Aiarako udaletxeko areto nagusian (Arespalditzan) eta ostegunean ordu berean Laudioko Kultur Etxeko Arraño gelan.
Solasaldi horietan Ferosca proiektuaren berri emango dute, baina eskualdean dauden beste egitasmoak ere aipatuko dituzte (Larragorriko zentral eolikoa, Ferosca II, azpiegitura fotovoltaikoak...). Halaber, Arantxa Tapia Ekonomia Sailburuak aurkeztutako Lurralde Plan Sektorialaren nondik norakoak ere izango dituzte hizpide.
Horrekin guztiarekin, plataformak animatu nahi ditu aiaraldearrak "eskualdean geratzen diren espazio libre bakarrak babestera".