Urtaro aldaketarekin funtzionamendu eta ordutegi berria abiatu du Faktoriak. Ekaina bitarte egongo da arratsaldez irekita, baina uztailaren 1etik aurrera jarduerak daudenean soilik irekiko dituzte ateak. Hots, astearte, asteazken eta ostegunetan egongo da espazioa zabalik, "jardueren ordutegietan". Saio guztiak irekiak eta doakoak izango dira.
Hain zuzen, astearteetan haur eta nerabeentzako ekintzak prestatu dituzte, goizez udalekuak martxan baitaude hainbat herritan. Gainera, Gorobel kirolgunearekin elkarlanean egingo dituzte saioak: uztailaren 9an eta 16an -asteartez- 18:30ean haur eta nerabeentzat kirol saioak eskainiko dira.
Dantza iluntzeak
Ikasturte amaierarekin dantza talde edo zaleak horretarako areto gabe geratu ohi dira. Hutsune horri erantzuteari begira, "Dantza iluntzeak" egingo dira hilaren 2an eta 23an. Lehen ostegunean Gabriel Gonzalezek swing soziala erakutsiko du (20:00etan), eta 23an Aitor Aizpuruak saltsa eta batxata.
Baka(i)rrizketak zikloa
Bestalde, Laudioko Udalari esker, "Baka(I)RRIzketak" saioak egongo dira ostegun iluntzeetan. Hain zuzen, uztailaren 4an Ander Malbadi, Asier Galartza, Maria Blanco, Aitziber Grados eta Erik Urbieta oholtzaratuko dira; eta 11n Julen Pagazaurtundua, Jokin Antsotegi eta Unai Apraiz. Gainera, afari eskaintza ere egongo da nahi duen ororentzat.
Sormen Faktoriako saio irekiak
Azkenik, Sormen Faktoriaren dinamika medio, entsegu eta saio irekiak egingo dituzte "sormen egonaldietan" Faktorian egongo diren artistek. Izan ere, euren obrak garatzeko astebeteko egonaldiak eskaintzen dizkie Kultura Faktoriak; espazioko baliabideak euren eskura jarrita. Hala, lehen asteazkenean Maria Iturbe eta Maialen Ramirez arituko dira euren lana aurkezten, 10ean Peru Galbete, 17an Amaia Molinte eta 24an Jare Prieto eta Eva Perez-Pons.
Bestalde, Urtzi Odriozola laudioarraren gidaritzapean, "Astronomia gaua"· egongo da uztailaren 11n, 22:00etatik aurrera. Faktoriako kideek azpimarratu dutenez, "uztaileko iluntzeetan elkarrekin euskaraz gozatzeko helburuarekin" osatu dute programazioa, Faktoriako Ideien Asanbladan ateratako proposamenak ardatz.
Egitarau eta informazio osoa hemen ikusi daiteke:
