Mediku faltak eragin nabarmena izango du udan Aiaraldean. Ekainaren hasieran jakinarazi zuen Osakidetzak ordutegi eta zerbitzu murrizketak egongo zirela hainbat osasun zentrotan, baina harago doa eragina. Izan ere, Amurrio eta Laudioko Etengabeko Arreta Guneetan ez da medikurik egongo udaren heren batean.
Hala jakinarazi diote hainbat osasun langilek Aiaraldea Komunikabideari. Zehaztu dutenez, uztailetik irailera bitartean Amurrion 35 egunetan faltako dira medikuak, eta Laudion 32 egunetan.
Honako hauek dira egunak:
Uztaila
- Amurrion: 2, 6, 10, 11, 12, 15, 16, 21, 25, 29 eta 30
- Laudion: 2, 3, 10, 14, 15, 20 eta 31
Abuztua
- Amurrion: 3, 6, 9, 10, 11, 13, 16, 18, 19, 22, 26 eta 27
- Laudion: 5, 7, 9, 10, 11, 12, 13, 15, 16, 17, 18, 20, 21, 26, 28 eta 30
Iraila
- Amurrion: 3, 4, 6, 7, 9, 12, 15, 16, 17, 23, 27 eta 28
- Laudion: 1, 2, 5, 6, 7, 8, 10, 14 eta 26
Hala ere, hori aurreikuspena baino ez da, beharginek nabarmendu dutenez. Bajak eta oporrak direla eta geratu dira egun horiek medikurik gabe, eta balizko ordezkoak bilatzen ari dira Osakidetzako arduradunak.
Dena den, langileek zail ikusten dute egoera bideratu ahal izatea, osasun sistema publikoaren estrategia izan ohi delako jada lanean dauden medikuei aparteko orduak egitea eskatzea.
Bajak eta oporrak direla eta geratu dira egun horiek medikurik gabe, eta balizko ordezkoak bilatzen ari dira Osakidetzako arduradunak.
Hori nahiko modu argian azaldu zuen Roberto Gonzalezek Aiaraldea Komunikabideari urte hasieran eskainitako elkarrizketan. Hala azaldu zuen Aiarako medikuak: “hain da larria arazoa, ezen hilabetez hilabete bakante geratzen diren postuen informazioa bidaltzen digutela lanean gauden profesionaloi, postu horiek bete ditzagun. Ni neu larunbat askotan laguntzera joaten naiz Laudioko edota Basauriko Etengabeko Arreta Guneetara. Hori ez da nire lana, baina medikuon onkeria eta boluntariotzagatik aurrera ateratzen da”.
Momentuz behintzat, ez dirudi ordezkoen bilaketak horrek fruiturik eman duenik. Asteartean ez zen medikurik egon ez Laudio ezta Amurrioko Etengabeko Arreta Guneetan. Asteazkenean, aldiz, egoera errepikatu zen Laudion, eta berdina gertatuko da bihar (larunbata) Amurrion, langileek aurreratu dutenaren arabera.
Asteartean ez zen medikurik egon Laudio eta Amurrioko Etengabeko Arreta Guneetan. Egoera errepikatu egin zen hurrengo egunean Laudion, eta Amurrion berriz gertatuko da bihar.
Arazo orokortua
Dena den, arazoa ez dago soilik eskualdean. Euskal Autonomi Erkidego osoan egongo da mediku gabezia datozen hilabeteetan. Hala azaldu dio ESK-k Aiaraldea Komunikabideari. Sindikatu horren aburuz, “planifikazio txarra” dago arazoaren atzean. “30 urte daramatzagu esaten aldaketak egin ezean belaunaldi aldaketa arazo batekin topatuko ginela, eta hala gertatu da”, nabarmendu dute.
Gainera, euren hitzetan, aurten faktore bat gehiago batu da arazo estrukturalera: Mediku eta Barne Mediku Egoiliarren promozioa irailera atzeratu dela. “Normalean ekainean ateratzen da eta langile berri horiek dira udako baja eta hutsuneak betetzeaz arduratzen direnak, baina aurtengo promozioaren ikasketa prozesuak COVID-19aren pandemiarekin kointziditu zuen bere garaian, eta horregatik atzeratu da”.
