EAJk Iñigo Pinedo Vadillo proposatu du Aiarako Kuadrillako presidente izateko eta Encina Castresana Astarloa ordezkatzeko. EAJ-PNVko batzarkideen 13 botoek eta PSE-EEren 2 botoek osatzen duten gehiengoari esker, Pinedo presidente izendatuko dute gaur egingo den osoko bilkuran.
"Ilusio eta gogo handiz hartzen dut ardura hau, eta Aiarako eskualdeko bizilagun guztien onerako nire onena emateko konpromiso sendoarekin. Ohore bat da gure lurraldeko bizi-kalitatea hobetzeko lan egiteko aukera izatea", adierazi du Pinedok.
EAJk azaldu duenaren arabera, sistema informatikoetako teknikari gisa duen esperientzia profesionalaz gain, Iñigo Pinedok 25 urtez "erantzukizuneko hainbat kargu bete ditu Aiarako Udalean". Bertan, gobernu-taldeko kide izan da azken legegintzaldietan, eta, gaur egun, zinegotzia da EAJ-PNVko udal-taldean.
Aiarako Kuadrillako batzarkide ere bada duela 15 urtetik, eta hainbat batzordetan parte hartzen du, hala nola ogasunekoan, non agintaldi honetan lehendakari lanak egin dituen.
Duela egun batzuk EAJk adierazi zuen Encina Castresanak Aiarako Kuadrillaren presidentetzari uko egin ziola bost urte eta gero, "arrazoi pertsonal eta politikoengatik".