Altxa Burua Aiaraldea egitasmoa sortu zuten udan eskualdeko hainbat familiak mugimendu horren xedeak zabaltzen jarraitzeko eta elkarlanak emaitzak eman ditu Zaraobe Institutuan. Izan ere, ikastetxe horretan Okondo eskola, Etxaurren Ikastola, Arteko Gure Ama Herri Ikastetxea, Urduñako Eskola eta Amurrioko Zabaleko eta Mendiko ikastetxeetako zenbait guraso lanean ari dira adingabeen artean 'smartphone'-aren erabilera atzeratzeko eta tresnak eskaintzeko gailu horiek baliatzeko.
Edonola ere, Altxa Burua Aiaraldeak ez du bere jarduera eten nahi: "Orain beste urrats bat egin nahi dugu eta gure inguruko hezkuntza-komunitate guztiak gonbidatu nahi ditugu, pantailak behar bezala erabiltzeak dakarkigun erronka handiari aurre egiteko besteko indarra duen eskualdeko erreferente izan gaitezen".
Orain arte egindako lanen artean azpimarratu dute inkestak sustatu dituztela gurasoek jakiteko zein erabilera mota duten euren seme-alabek, 'smartphone'-ari dagokionez. Ekimenak emaitza positiboak utzi ditu, bultzatzaileen aburuz: "Horien bidez, familia askok gai horri buruzko informazioa jasotzeko beharra ikusi dute, bai eta beste hainbatek lehen 'smartphone'-a emateko atzerapena hitzartzen duten familia-taldeetan parte hartzeko borondatea ere, gaur egun presio eta inertzia soziala baitira emate horren arrazoi nagusietako bat".