Elkarretaratzea egin zuten atzo Amurrioko Juan Urrutia plazan, otsailaren 4an Irunen jazotako erailketa matxista salatzeko, Euskal Herrian aurten jazotako bigarrena izan dena. Aiaran, aldiz, Ferialean egin zuten mobilizazioa:
Artziniegan, ordea, frontoian egin zuten protesta:
Mobilizazioen antolatzaileek "babes eta elkartasun osoa" helarazi nahi izan zieten eraildako emakumearen "senide, lagun eta gertukoei". Nabarmendu zuten "nazkatuta, nekatuta eta haserre" daudela, baina baita "prest" ere, horrelako gertakariak kalean salatzen jarraitzeko. "Prest gaude erakundeei eraso matxista bat gertatzen den bakoitzean minutu bateko isilunea egitea baino zerbait gehiago egiteko eskatzeko, eta indarkeria matxistaren konplize den orori ardurak exijitzeko, gizonei bereziki", adierazi zuten elkarretaratzean.
Gogorarazi zuten erailketa matxistak direla "indarkeria matxistaren eta estruktura heteropatriarkalaren ondorio izugarri eta lazgarrienak", baina badaudela beste "hamaika aurpegi" ere: "indarkeria matxista da emakumeon* diru iturriak kontrolatzea, indarkeria matxista da kaletik begiradarekin akosatzea, indarkeria matxista da eraso bat salatzen dugun bakoitzeko gure hitza zalantzan jartzea, indarkeria matxista da gizonen arteko aliantzak eraikitzen eta sostengatzen jarraitzea eta hartu beharreko ardurei entzungor egitea, eta indarkeria matxista dira egunero pairatzen ditugun adibide gehiagoren zerrenda amaigabe bat, zoritxarrez".
Horren guztiaren aurrean, "urgentziazko mekanismoak" aktibatu behar direla aldarrikatu zuten Mugimendu Feministako kideek, indarkeria matxistarena "lehen mailako arazo sozial eta politikotzat hartua izan dadin". Horrekin batera, "antolakuntza eta autodefentsa" aldarrikatu zituzten, "tresna eraginkorrenak" direla iritzita.