'Miñan': istorio bakarra eta bi formatu, asteon eskualdean

Aiaraldera helduko da asteon Miñan, eta istoriora gerturatzeko aukera bikoitza egongo da: ostegunean, Faktorian, eta larunbatean, Amurrio Antzokian.

Ibrahima Balderen historia biltzen duen liburua da Miñan, hark ahoz kontatua eta Amets Arzallusek letraz idatzia. 2019an eman zuen Susa argitaletxeak liburua, eta dagoeneko sei hizkuntzetara itzulia izan da. 

Konakrytik Irunera

Horixe izan zen Ibrahima Baldek bere anaia txikiaren bila Europara egindako bidaia. Saharako basamortua gurutzatu zuen, Mali, Aljeria eta Libiatik igaro eta 2018an ailegatu zen Irunera. Irungo Harrera Sarean zebilen Arzallus garai hartan, eta bertan ezagutu zuten elkar.

Idazleak gaztelaniazko edizioaren hitzostean azaltzen duenez, Ibrahimaren historia paperean jartzeko erabakiak ez zuen asmo literariorik, eta poliziari aurkezteko asilo-eskari bat zen hasieran. Baina bere hitz egiteko moduak hainbeste liluratu zuen ezen beste xede bat merezi zuela iruditu zitzaion.

Paperetik oholtzara 

Liburua antzezlan bilakatu eta izen bereko obra muntatu du Artedrama Arte Eszenikoen Plataformak. Timberlake Wertenbakerrek egin du antzerkirako egokitzapena (bai eta liburuaren ingelesezko itzulpena ere), eta Ander Lipusek, Manex Fuchsek eta Philippe Ducouk zuzendu dute lana. 

Sambou Diaby aktore zumaiarrak gorpuzten du Ibrahima, eta Eihara Irazusta, Mikel Kaye eta Ander Lipus ditu bidelagun oholtzara igotzean. 

Euskal Herriko hainbat txokoetatik dabil Artedrama konpainia obra honekin biran, eta larunbatean helduko da Amurrio Antzokira. 20:00tan izango da eta sarrerak salgai daude antzokiko weborrian.

Aurretik, solasaldia Faktorian

Antzezlana eskualdera heldu aurretik, baina, Amets Arzallus idazlea Faktorian izango da, liburua aitzakiatzat hartuta, migrazioaz, nortasunaz, eta sorkuntzak izan dezakeen eraginaz berbetan. 

Arzallus ez da bakarrik egongo. Izan ere, Faktorian horma-irudi bat margozten dabil asteon Martz artista zornotzarra, Kultur Faktoriak 2024an banatutako sormen beketako bat irabazi izanaren emaitza, eta tarte batez batuko zaio esperientzien elkartrukean. 

Solasaldiaren sarrerak ere dagoeneko eskuratu daitezke hemen.