Altxa Burua mugimenduak urrats sendoak egin ditu azken urtean bere helburuak lortzeko eta azkena ikastetxe guztiak batzea izan da. Horretarako, otsailaren 5ean Amurrioko Kultura Etxean elkartu ziren Aiaraldeko hezkuntza zentro guztietako (publikoak zein itunpekoak) zuzendaritzetako kideak, IGEetako ordezkariak, berrikuntzako eskola-arduradunak (BEA) eta hainbat irakasle.
Guztien erabakia izan zen Altxa Burua Aiaraldea mugimenduarekin bat egitea eta, ondorioz, neurriak hartzea adingabeek teknologia berriekin (pantailekin bereziki) dituzten harremanak osasuntsuak izateko.
Irizpide zehatzak jarraituko dituzte horretarako. Hasteko, Osakidetzako gomendioak hartuko dituzte oinarri. Horrez gain, hurrengo irizpideak izango dituzte:
- 0-6 urte bitarteko umeek pantailarik ez erabiltzea.
- 6-12 urte urte bitarteko adingabeek ordubete erabiltzea gehienez egunean eta lagunduta.
- 12-16 urte bitarteko adingabeek 2 ordu gehienez erabiltzea pantailak eta edukien kontrola egotea.
- Sakelakoa 16 urte bete arte ez entregatzea gomendatzea.
- Ikastetxeak telefono adimendurik gabeko espazio bihurtzea.
Hezkuntza zentroen aburuz, ikasgelak bozgorailuak dira "eta bat egiten dute familiei eta herritar guztiei jakinarazteko zer arrisku-egoerari aurre egin behar diogun zerbait koordinatuta egin ezean".
Halaber, hezkuntza komunitateak mezua zabaldu du Helduak gara eredu leloarekin: "horregatik, heldu guztiok kontzientziatu behar dugu, gure haur eta gazteei eredu osasungarri eta egokia eskaintzeko. Erronka handia da, baina gogoz eta indar handiz onartzen dugu".
Horrez gain, ikastetxeen nahia da Araban, gutxienez, ahalik eta gehien zabaltzea jarrera hau.