Eskualde bat, Aiaraldeak hamabost!

Datorren apirilaren 17an hamabost urte beteko dira Aiaraldea Komunikazio Leihoa ireki zenetik. Eskualde osoko 50 pertsona boluntarioen ekimen eta inplikazioari esker, Aiaraldea.com webgunea jarri zen martxan orduko hartan, urte batzuk geroago Aiaraldea.eus gisa berrizendatu zena.

Bilakaera handia izan du proiektuak urte hauetan guztietan, eta abian dago hori ospatzeko dinamika, Eskualde bat, Aiaraldeak hamabost lemapean. 

Bideo bat sareratu dugu horretarako, Madalen Artetxe protagonista duena. "Euskaratik ez balitz, zer litzateke Aiaraldea? 15 urte pasa dira berde geundenetik, komunikazio leihoak zabalduz hazi dugu lur hauetan euskara”, aldarrikatu du musikari amurrioarrak, “zurekin osatu dugu bidea, atzean utzi ditugu maldak, zabaldu ditugu ateak, egin dugu Aiaraldea. Garena eta izango garena dugu ospatzeko, egin dezagun topo, egin dezagun topa, eskualde bat, Aiaraldeak hamabost". 

Ikus-entzunezkoa plazaratuta hasi da 15 urte hauetako ibilbidearen ospakizun dinamika, urte amaierara arte luzatuko dena. Datozen egun eta asteetan plazaratuko da egingo diren ekimenen gaineko gaineko informazio gehiago, aurrerapen txiki bat jada sareratu dugun arren: 

Komunikazio leihotik ekintzen faktoriara

2010ean Aiaraldea Komunikazio Leihoa zena Aiaraldea Komunikabidea da orain. Gaur egun, webgune anitz bat (Aiaraldea.eus), papereko edizio zabal bat (hamabostekaria, udako jaietako aldizkari berezia eta urtekaria) eta sare sozial ugari ditu proiektuak, euskarazko tokiko hedabide bakar eta erreferentea bihurtuta. 

Baina proiektua ez da horretara mugatzen. 2015. urtea inflexio puntu garrantzitsua izan zen egitasmoarentzat. Bost urteko ibilbidea beteta, hurrengo bosturterako Gogoeta Estrategikoa abiatu genuen. Ondorio esanguratsuak atera ziren hausnarketa prozesu luze horretatik. Ondorioztatu genuen ordura arte gaztelerazko errealitate baten berri euskaraz ematera mugatu ginela Komunikabidearen bidez, eta bazela unea urrats bat gehiago eman eta Aiaraldean euskaraz bizitzeko tresna berriak martxan jartzeko.

Gauzak hala, langile zein boluntarioek erabaki estrategiko garrantzitsu bat hartu zuten: proiektuaren irismena dibertsifikatzea, lan-lerro berriak irekiz. Hastapenean euskararen biziberritzea komunikazioaren esparruan kokatzen bagenuen ere, ordutik aurrera bizitzako esparru guztietan euskaraz egituratuko ziren alternatiba eraldatzaileak lantzea erabaki genuen.

Metamorfosia abiatu genuen horretarako, komunikazio leihoa ekintzen faktoria bilakatzeko. Aiaraldea Komunikabidea, proiektu bakarra izatetik, egitasmo globalago baten adarretako bat izatera pasa zen, beste ildo batzuekin batera: feminismo ildoa, elikadura burujabetzarena, hezkuntza eta aisialdiarena, euskararen normalizazioarena, kultur sorkuntzarena, ekonomia sozial eraldatzailearena eta identitate komunitarioarena. 

Izaera juridikoan ere eman zen urratsa. Gogoeta Estrategikoan erabaki zen elkarte izatetik irabazi asmorik gabeko gizarte ekimeneko kooperatiba izatera pasatzea: Aiaraldea Kooperatiba Elkartea. Gaur gaurkoz, 500 familia-unitate baino gehiago dira kooperatibaren bazkide. 

Baina azken urteetan emandako urratsik deigarriena espazio fisikoari lotutakoa da. 2015ko Gogoeta Estrategiko hartan atera zen beste ondorioetako bat izan zen bazegoela beharra aipatutako ildo guztien garapena bermatuko zuen egoitza sozial bat irekitzeko. Horrela sortu zen Faktoria espazioa. Ehunka bazkidek eginiko borondatezko kapital ekarpenei esker, Laudioko Industriagunean kokatutako pabilioi bat erosi zuen Kooperatibak, eta proiektu arkitektoniko berritzailea garatu zuen eraikinaren barruan erabilera anitzeko espazio zabal bat eraikitzeko.

Bertan dago Aiaraldea Komunikabidearen erredakzioa, gainontzeko ildoen bulegoak, eta baita bestelako espazio publikoak ere: plaza, kantina, kultur ekitaldietarako oholtza eta aretoa… Laudion kokatuta dagoen arren, eskualdeko perspektibarekin pentsatutako espazioa da Faktoria, euskararen Aiaraldeko arnasgunea.