Aiaraldeko pentsiodunek iragarri dute berriro hasiko dutela kanpaina Arabako Foru Aldundiak autobus zerbitzu zuzena ezarri dezan eskualdetik Usansolo ospitaleraino. Iragarpena foru erakundearekin izandako zenbait elkarrizketen ondorioa izan da.
Berez, duela bi urte hasi ziren aldarrikapena plazaratzen eta ez daude pozik foru erankudearen lanarekin. Zehazki, garraio publiko hori martxan egon dadin duela urtebete onartu zuten mozioa Arabako Batzar Nagusietan, baina, momentuz, ez dago autobusik ibilbide hori egiten.
Gauzak horrela, martxoan urtebete bete zenez testua onartu zenetik, Aiaraldeko pentsiodunak Mugikortasun Diputatuarekin jarri ziren harremanetan eta jasotako mezua ez zuten gogoko izan. Hain zuzen, diputatuak erantzun zuen aste edo hilabete batzuetan zehaztuko duela proposamena.
PPren galderak
Erretiratuek ez ezik, PPk ere galdetu zion Arabako Foru Aldundiari zein zen autobus zerbitzua ezartzeko kronograma. Gobernuak erantzun zuen lanean ari direla urtea amaitu baino lehen garraioa funtzionamenduan egon dadin, baina ezin zuela datarik zehaztu.
Halaber, erantzunean Arabako Foru Aldunduak argitu zuen aurreikusitako 500.000 euroko aurrekontua 200.000 eurokoa izango dela aurten.
Pentsiodunen kritikak
Alderdi popularrari emandako informazioak ez ditu baretu eskualdeko erretiratuak, zeintzuek azpimarratu duten ez dakitela zer ari den aztertzen Foru Aldundia. Bide batez, argi utzi dute euren aldarrikapena dela zerbitzu berria eta zuzena egotea Usansolora, ez beste batzuk aldatzea edo egokitzea. Hau da, orain arteko zerbitzuek ez dutela aldaketarik edo murrizketarik izan behar.
Horrez gain, azpimarratu dute nahikoa itxaron dutela jadanik eta 2025ean indarrean egon behar dela garraio sistema hori "bai ala bai".