Aiaraldeko Berehalako Jarduera Planaren jarraipenak desadostasunak sortu ditu berriro Arabako Batzar Nagusietan. EH Bilduk mozioa aurkeztu zuen iragan asteazkeneko osoko bilkuran, plana "azkartzeko, orain arte egindakoa zehatz-mehatz baloratzeko eta eman beharreko urratsak herritarrekin eta tokiko udalekin adosteko".
Baina proposamenak Elkarrekin Arabaren babesa baino ez zuen jaso, talde subiranistak berak salatu duenez. Hori deitoratu du EH Bilduren batzarkide taldeak, prentsara bidalitako ohar baten bidez.
Komunikatu horretan azaldu dutenez, eskualdeko egora sozioekonomikoa "ez da asko aldatu EH Bilduk berak Aiaraldeko egoerari buruz Eusko Legebiltzarrean ponentzia bat egitea proposatu zuenetik". Gainera, ordutik hona hainbat "enpresa handi" itxi direla nabarmendu dute, "Glavista, Valvospain edo Guardian bezalakoak".
Horregatik, planaren funtsak "egingarriak diren ekimenetara" bideratzea eskatu zuen EH Bilduk mozioan, "ekimen horiek Aiaraldeko udalekin batera zehaztuz" eta "balorazio-txosten bat" ere osatuz, "plana gauzatzeak eta hura ezartzeak eskualdeko ekonomian eta ongizatean izango dituen ondorioak jasotzeko".
Ildo beretik, EH Bilduk defendatu du eskualdeko udalak direla eskualdeko egoera sozioekonomikoa "ondoen ezagutzen dutenak", eta horregatik defendatu dute tokiko erakundeen parte hartzea. Oposizioko taldearen aburuz, une honetan indarrean dagoena "amaigabeko ekintza-plan bat" bihurtu da, eta "Aiaraldeak ezin du gehiago itxaron".