Ekitaldi berezia egongo da bihar (ekainak 4) Amurrio Antzokian. Juventud que no se atreve estreinatuko dute, Luis Vilek zuzendutako filma laburra. Bost minutu inguruko ikus-entzunezkoa izango da, Laudio eta Amurrioko Helduen Hezkuntzako Ikastegiekin (HHI) batera grabatutakoa.
Hezkuntza zentro horretako kideak izan ziren Vilengana jo zutenak. "Bertako irakasleek garatu zuten hasierako planteamendua, eta ni sartu nintzen gero, gidoiari forma emateko", azaldu du Amurrioko zinemagileak. Protagonistak aukeratzea, lokalizazioak topatzea eta gidoia entseatzea izan ziren hurrengo urratsak. Eta, azkenik, grabaketa. Martxoaren 22 eta 23ko asteburuan egin zuten errodajea.
Bost minutuko filma laburra ekoiztu dute, benetako gertakarietan oinarritutako istorio bat kontatzeko.
Benetako gertakarietan oinarrituta dago bihar antzokiko pantailan proiektatuko dena, lokalizazioak eta pertsonai batzuk fikzionatu dituzten arren, "istorioa zinema formatura eraman ahal izateko". Vilen hitzetan, HHIn ikasten duten pertsonen errealitatea du ardatz kontakizunak, begirada jarriz ikasleen artean dauden baliabide ezberdintasunetan. Hala azaldu du pelikularen zuzendariak: "Baliabide gutxiago dituzten pertsonek, baliabide gehiago dituztenen aldean, ikasteko borondate handiagoa dute etorkizun hobea lantzeko, eta migratzaileen kasuan, gizartean eta kulturan errazago integratzeko".
Vilek badu esperientzia aktore ez profesionalekin lanean, duela zenbait urte Flores de papel filma ekoiztu baitzuen Asasamekin elkarlanean. Hala ere, bere hitzetan, "nahiko emozionantea" izan zen grabaketa prozesua, bertan parte hartu zuten aktoreak ez direlako inoiz jarri kamara baten aurreran, eta hazkuntza prozesu bat bizi izan dutelako pertsonaiei bizitza eman ahala. Horrez gain, zinemagileak nabarmendu du protagonista nagusietako bat emakume arabiar bat dela, eta "lorpen kolektibotzat" jo du emakume horrek "bere buruarekin eta bere ingurunearekin" eginiko ahalduntze lana, agian "ate bat ireki" dezakeelako "arabiar jatorriko migratzaile askorentzat".
HHI zentroen jarduna jendarteratzea ere badu helburu filmak. "Neurri batean, oso jende gutxik ezagutzen ditu", azaldu du Vilek, eta aldarrikatu du horrelako ikastetxeek balio dutela "bigarren aukerak" emateko, eta baita kultura eta belaunaldi anitzeko kideak batzeko ere.
Arratsaldeko zazpietan izango da biharko estreinaldia. Proiekzioaren ostean, zineforuma egingo dute bertaratutako kide guztien artean, eta zuzendariak berak egingo ditu dinamizatzaile lanak. Ondoren, Internetera igoko dute pelikula, jende ororentzat ikusgai egon dadin.
