Udaberrian esleitu zituen Kultur Faktoriak urtero sormen-proiektuak babesteko banatzen dituen bekak. Orduz geroztik Rlantz, Nagore Tamayo, Julen Zubiete eta Natalia Albeniz euren sormen prozesuetan lanean egon dira, eta horien emaitzak aurkeztuko dituzte bihar, Faktorian egingo den jaialdian.
Ekitaldia 19:00etan abiatuko da (18:30ean irekiko dira ateak) eta hilabeteotan garatutako prozesu kreatiboak ezagutzeko parada izango dute bertaratzen direnek. Antolatzaileek aurreratu dutenez, biharko hitzordua "topaketa eta ospakizuna izango da", udari gogotsu ekiteko aukera paregabea.
Sarrerek hiru euroko prezioa izango dute Faktoriako bazkideentzat eta bost eurokoa bazkide ez direnentzat. Aldez aurretik erosi daitezke, hemen, eta jaialdiaren hasieran bertan erosteko aukera ere egongo da.
Hainbat diziplina lantzen dituzte jaialdian parte hartuko duten lau artistek, eta horrek ukitu berezia emango dio biharko arratsaldeari: arteaz, bere osotasunean, gozatzeko eta hausnartzeko izango dute publikoak zein artistek. Izan ere, mahainguru batekin emango diote hasiera egitarauari, eta lan bakoitzaren ostean (edo aurretik) sortzaileekin solasteko tartea egongo da ere bai.
Aurkeztuko diren sormen lanei buruz gehiago jakin nahi? Bada, jarraitu irakurtzen, hauxe duzue-eta biharko jaialdian eskainiko denaren aurrerapena:
Natalia Albeniz · Arte plastikoak
Menditik ibili, uretan sartu
Proiektu honen bidez, hausnartu nahi da banaka eta kolektiboki, gure nortasunaren eraikuntzan naturguneekin elkarreraginak daukan rolari buruz. Jolasaren, behaketaren eta ikusmenaz haraindiko ia zentzumen guztien bidez gertatzen den elkarrekintza.
Julen Zubiete · Ikus-entzunezkoak
Argi-jolasak
Ikus-entzunezko lan esperimental bat da. Proiektuaren behin-behineko izenburuak ongi definitzen du zein den proiektuaren asmoa esperimentazio lan honekin: jolastea. Jolasa ikasteko modurik onena bezala ulertzen du Julenek eta oraintxe bertan argiarekin jolastu nahi du; argia esperimentatzeko “jostailua” izan dadila.
Nagore Tamayo · Dantza eta kantua
Nolako zura, hileta bat inozentziari
Dantza garaikidea, jotak eta sampleak biltzen dira hemen, ama-alaba harremanaren arrakaletatik inozentzia hil, eta errealitateari pastel koloreak kenduz.
Rlantz · Musika
Uhinen dantza
Proiektua musika elektroniko atmosferiko eta esperimentalaren esparruan kokatzen da. Soinu-esperimentazioa oinarri hartuta, sintetizadoreak eta efektu analogikoak erabiliko dira, ehundura aberatsak eta giro sakonak sortzeko. Nahiz eta instrumentalizazioak pisu handiagoa izan, euskarazko ahotsak ere erabiliko dira zenbait abestitan. Gainera, zuzenean eskaintzeko moduan arreta berezia jarriko da, efektu gehienak eta zenbait melodia zuzeneko interpretazioan sartzeko.
