Aiaraldeko Mendiak Bizirik plataformak hausnarketa hasi du jadanik Ferosca I zentral eolikoaren Plan Bereziaren kontra. Taldeak aipatu du Foru Aldundiak piztutako prozedurari ezin zaiola inolako alegaziorik aurkeztu, baina pentsatzen hasi dira estrategia hurrengo urratsetan makroproiektu energetikoa gelditzeko.
Hain zuzen, plataformak zehaztu du plan hori behin betiko onartzeko fasean aukera egongo dela alegazioak aurkezteko. Horren aurrean jadanik egindakoak berriro baliatzeko bidea egingo dute eta animatuko dute elkarte, Administrazio Batzar eta auzokide interesdun orori informazioa eskatzen. Halaber, mobilizazio kolektiboa aktibatzeko beharra azpimarratu dute.
Epaitegira jotzeko aukera ez dute baztertzen
Aiaraldeko Mendiak Bizirikek aipatu du dauden tresna guztien erabilera ikertuko duela eta horrek suposatzen du aukera dagoela epaitegira jotzeko administrazioarekiko auzi-errekurtsoaren bitartez.
Berez, plataformak gaineratu du Aiarako zein Laudioko Udalek uko egin diotela Plan Berezia izapeditzeari argudiatuta hirigintza eta antolamendu araudiarekin bateraezina dela. Taldeak azpimarratu du 2/2006ko Lurzoru eta Antolamendu Legearen 92. artikuluak exijitzen duela plan bereziek jadanik existitzen den araudia errespetatzea.
"Aldundiak Plan Berezia izapidetu dezake, baina ezin du, inondik inora, antolamendu tresnak eta udal araudiak aldatu. Hori egingo balu bere eskumenak gaindituko lituzke", adierazi du plataformak.
Taldeak bide gehiago ikusten ditu Ferosca I proiektuaren kontrako jarduna elikatzeko eta, besteak beste, gogoratu dute benetako parte hartze herritarra bermatu behar duela Aldundiak.
