Atzo izan zen Arabako Batzar Nagusietan politika orokorreko eztabaidaren saioa eta Ramiro Gonzalez lurralde historikoko Ahaldun Nagusiak hitzartze luzea egin zuen. Gaza, Ukrainia, Donald Trumpen zergak... Gai anitz izan zituen hizpide eta Aiaraldeari buruz ere mintzatu zen.
Hain zuzen, foruburuak aipatu zuen uste duela "Eusko Jaurlaritzak eta Foru Aldundiak Guardian enpresaren instalazioetarako egiten dituzten kudeaketek albiste onak denbora gutxian” emango dituztela. Edonola ere, politikariak ez zuen inolako zehaztasunik erantsi.
Momentuz, epe motzean argi dagoen errealitate bakarra da Guardianek gutxieneko jarduerarekin jarraituko duela 2026ko maiatzera arte. Izan ere, bi langile ditu kontratatuta horretarako.
Halaber, Gonzalezek aitortu zuen Laudiok ez duela berri onik izan industriaren arloan eta lehiakortasuna indartzeko inplikazioa eskatu zuen.
Amurrioko ikus-entzunezko huba ere oroitu zuen ahaldunak eta zinemarekin erabili duten pizgarri fiskalen politika biozientziaren esparruan bultzatuko dutela azaldu zuen.