Palestinako herriaren aldeko lanuzte orokorra deitu dute Hego Euskal Herriko sindikatu eta eragileek biharko. Genozidioarekin harreman oro eten eta Israelen isolamenduan sakontzea izango da eguneko aldarrikapen nagusia, "Palestinarekiko konpromisoa" azpimarratuz. Modu horretan, azken hilabeteetako mobilizazio olatuari segida ematearen beharra aldarrikatu dute lanuzte orokorraren deitzaileek.
Gauzak horrela, hiru eta lau orduko lanuzteak egingo dituzte bihar Aiaraldean. Hiru orduko lanuzteak izango dira LAB, CCOO, UGT, ESK, Steilas, CGT, Etxalde eta HIRU sindikatuek deituak, eta ordubete luzeagoak ELA sindikatuak deitutakoak. Lanuzteak hiru txandatan banatuko dira; goizaldean, eguerdian eta iluntzean. Hezkuntza zentroena izango da salbuespena: toki horietan egun osoko greba deitu dute, maila guztietan.
Lanuztearekin bat eginez, mobilizazioak iragarri dituzte bihar goizean Bilbon, Gasteizen, Donostian eta Iruñean. Eskualdetik deialdi ugari antolatu dituzte deialdi horietara bertaratzeko. Laudioko hezkuntza komunitateko kideek, esaterako, 10:30etan jarri dute hitzordua Laudioko tren geltokiko plazan. Elkarretaratzea eta argazkia egingo dituzte bertan, eta Bilbora bertaratzeko trena hartuko dute jarraian.
Burrunbak udaletxeen aurrean
Arratsaldean herri eta eskualdeetako mobilizazioek hartuko dute protagonismoa, eta Aiaraldean ere izango dute oihartzuna. Gernika-Palestina herri ekimenaren deialdiarekin bat eginez, elkarretaratze zaratatsuak egingo dituzte eskualdeko zenbait udaletxeren aurrean:
- Urduña: 19:00etan Foru Plazan
- Artziniega: 19:30ean udaletxe aurrean
- Amurrio: 19:30ean Juan Urrutia plazan
- Laudio: 19:30ean Herriko plazan
- Orozko: 19:30ean Zubiaur plazan
Herrietako mobilizazioak iraun bitartean komertzioak ixteko proposamena luzatu dute Artziniegako, Amurrioko eta Laudioko merkatari elkarteek.
Aiaraldea Kooperatiba Elkarteak bat egin du lanuzte orokorrarekin. Palestinaren aldeko mobilizazioen jarraipena egitera mugatuko dira Aiaraldea Komunikabideko kazetariak, eta horren berri baino ez du emango. Faktoria, aldiz, itxita egongo da arratsaldez, eta ez da atelierrik egongo.