ELA sindikatuak jakinarazi du ez duela parte hartuko Arabako Foru Aldundiak deitutako Aiaraldeko Industria Garatzeko mahaian. Iragan urriaren 23an agerraldia egin zuen Ramiro Gonzalezek Aldundiak Laudion dituen bulegoetan, “eskualdeak bizi duen egoera iraultzeko asmoz” indarrak batu eta Aiaraldeko etorkizunaren aldeko akordio zabala erdiestea proposatzeko.
Marko horretan parte hartzera uko egin dio ELAk eta azaldu du sindikatuak ez duela, oro har, elkarrizketa sozialeko mahaietan parte hartzen. Izan ere, horrelakoetan “ELAren parte-hartzea helburu propagandistikoekin erabilia izaten da, politika neoliberalen inposaketa parte-hartze sozialarekin eman denaren itxurak egiteko, ELAren iritzia kontuan hartu gabe”.
Ahaldun Nagusiarekin biltzeko prestutasuna adierazi du ELAk, baina irmoki adierazi du ez duela onartuko sindikatua erabiltzea “interes alderdikoiei mesede egiteko”
Era berean, sindikatuak adierazi du ez duela uste Aldundiak “industria politikan sakoneko aldaketarik eragin nahi” duenik. Gaineratu dute eskualdean lan-gatazkak egon direnean foru erakundea langileen ordezkaritzen aurka lerratu dela “sistematikoki”, Tubacex, Glavista, Guardian edo Maderas de Llodioren kasuei dagokienez.
Gardentasun falta ere leporatu diote Aldundiari. Izan ere, azaldu dute deitzaileek ez dutela zehaztu gonbidatu dituzten eragileak edo eztabaida foro horren lan metodologia. “Modu honetan, nahi dituzten ondorioak egiten dituzte publiko eta beren proposamenekin erabat
kritikoak garen eragileak erabili egiten dituzte eztabaida irekiak egin izanaren itxurak egiteko”, azaldu du sindikatuak.
Ahaldun Nagusiarekin biltzeko prestutasuna adierazi du ELAk, baina irmoki adierazi du ez duela onartuko sindikatua erabiltzea “interes alderdikoiei mesede egiteko”.
Ramiro Gonzalezen erantzuna
Arabako Ahaldun Nagusiak sindikatuaren erabakia gaitzetsi du eta “bertako industriari eta haren menpe dauden langileei bizkarra ematea” leporatu dio. Mahaia “benetako konponbideak lantzeko espazioa da”, foru erakundearen arabera, eta “eskualdeko eragile politiko, sozial eta ekonomiko guztiei irekita dago”.
Gonzalezek ELAren jakinarazteko moduak ere deitoratu ditu, ez baitira Aldundiarekin jarri harremanetan erabakiaren berri emateko, baizik eta komunikabideekin zuzenean, Ahaldun Nagusiaren arabera.
Hala eta guztiz ere, lan egutegiarekin aurrera jarraituko dute Aldundiak eta mahaian parte hartuko duten beste eragileek, eta ateak irekita dituela jakinarazi diote ELAri.