"Pozik eta gogobeteta" esnatu da gaur Barrrk taldea, Gaztea Maketa Lehiaketako finalaren biharamunean. Gasteizko Jimmy Jazz aretoan eskaini zuten kontzertua bart, Gar, Marmitako Trap Banda eta Zeatikez taldeekin batera.
Gozatzera eta ondo pasatzera zihoazela aitortu zioten finalaren bezperan Aiaraldea Komunikabideari. Esan eta egin. "Gustura" azaldu da taldea Gasteizen eskainitako zuzenekoarekin: "Oso ondo aritu ginen laurak oholtza gainean, egundoko kontzertua izan zen. Pilo disfrutatu genuen eta hori da garrantzitsuena". Jon Basaguren epaimahaikideak "Courtney Barnett eta Joy Divisionen arteko nahasketa" gisa definitu zuen bandaren proposamena.
Harrobia Saria
Ez dira esku hutsik itzuli. Epaimahaiak Harrobia Sariarekin saritu zuen Barrrk atzoko finalean. Sariari esker, lau abestiko EPa grabatzeko aukera izango dute Oso Polita diskoetxearekin.
Epaimahaiak balioan jarri zuen eskualdeko bandaren zuzenekoa, eta "euskarazko kanta gehiago" entzun nahiko lituzkeela adierazi zuen SÜNE musikari eta epaileak. Barrrk-ek erronka onartu du, hizkuntzak duen garrantziaren jakitun.
Aitortza jaso arren, "musika lehiaketa bateko emaitzak beti subjektiboak direla" azpimarratu dute Barrrk taldeko kideek, finaletik kanpo "talde oso-oso onak" geratu direla iritzita.
Edonola ere, laukotearen proiektu musikalak lortu duen "ikusgarritasuna" balioan jarri dute Rubenek, Yasminek, Josuk eta Brunok.
Behin Gaztea Maketa Lehiaketa atzean utzita, urte amaiera bitarte dituzten zuzenekoetan zentratzea da bandaren asmoa. Besteak beste, Faktorian izango dira abenduaren 13an, Palestinaren aldeko jaialdian.
