Ehunka herritarren topaleku izango dira eskualdeko plazak gaur, indarkeria matxistaren aurkako nazioarteko egunean. Herriz herri mobilizazioak eta elkarretaratzeak deitu dituzte Aiaraldeko eragile feministek eta erakunde publikoek. Amurrioko eta Laudioko udaletxeen aurrean izango dira eguneko lehen hitzorduak. Tokiko gobernuek udal talde guztiekin batera adierazpen instituzional bana irakurriko dute, 10:00etan eta 12:00etan, hurrenez hurren.
Ikasle mugimendua ere batuko da eguneko mobilizazio zaparradara. Ikamak deituta elkarretaratzea egingo dute ikasleek Laudioko Lamuza plazan 11:15ean, "Hezkuntza Sistema honek erasotzen gaitu, guk hezkuntza feminista!" lelopean.
Elkarretaratzeak eta manifestazioak
Arratsaldean herrietako mobilizazioen txanda izango da. Aiaraldeko udalerri gehienetan elkartuko dira herritarrak indarkeria matxistaren eta berau sostengatzen duten "konplizitate sareen" aurrean "erresistentzia feministaren" beharra aldarrikatzeko.
Aiarakoa izango da elkarretaratzerik goiztiarrena; 17:30ean batuko baitira auzokideak ferialean. Artziniegan eta Okondon 18:00ean deitu dituzte mobilizazioak. Aretan 18:30ean egingo dute elkarretaratzea Altamira Plazan, baina, aurretik, Txoko Morearen inaugurazio ekitaldia egingo dute, 18:00etan Aretako Kultura Etxean. Gainerako mobilizazio guztiak (Laudio, Orozko, Urduña, Amurrio eta Arrankudiaga-Zollo) 19:00etan izango dira.
Baina badira mobilizazioetatik harago ere antolatutako jarduerak ere. Agenda atalean daude deialdi guztiak ikusgai.