Palestinaren aldeko jaialdi batekin ezaugarrituko dute Aiaraldearen 15. urteurrena. Faktorian izango da zita abenduaren 13an. Modu horretan, palestinar herriak bizi duen “biolentzia sistematikoan” jarri nahi dute begirada, eta nabarmendu dute egun horretan lortzen den diru guztia Gazara bideratuko dutela. Ekarpen ekonomikoak egiteko kutxa jarriko dute horretarako.
Aiaraldea Ekintzen Faktoriaren eta eskualdeko hainbat norbanako eta eragileren indarren baturaren emaitza izango da ekimena. “Urte amaierako festa antolatzen ari ginela jakin izan genuen emakume talde bat Palestinaren aldeko ekimena antolatzen ari zela, eta elkarlana garatzea erabaki genuen orduan”, azaldu dute. Elkarlan horren emaitza da aurkeztu berri duten egitaraua, goizetik gauera arte luzatuko dena.
11:30ean egingo dute ongi etorri ekitaldia, eta azoka irekiko dute jarraian, Laudio Palestina, Torontile eta Olaia Benitoren postuekin.
Dantza emanaldia egongo da gero Baes Fam taldearekin, eta mural kolaboratiboa egingo dute, DJ Miraklek giroturik. Solasaldi batekin emango diote amaiera goizeko txanpari, Nayua Jatri Aduh eta Aitor Bikandirekin.
Hitzaldia, musika emanaldiak, dokumental estreinaldia, poesia, bazkaria eta beste hainbat jarduera egongo dira goizetik gauera arte.
Bazkaria egingo dute arratsalderako indarrak hartzeko. Tiketak salgai daude dagoeneko Faktorian, Txokogorrin (Amurrio) eta El Lion (Laudio). Tiketen prezioa, aldiz, aldakorra izango da. 0, 5 eta 10 euroren truke eskuratu ahalko dira txartelak, pertsona bakoitzaren egoera ekonomikoaren arabera.
Musikak eta ikus-entzunezkoek hartuko dute protagonismoa arratsaldean. 17:00etan Rifqa poesia musikatu emanaldia egongo da. Eider Beobide, Peru Galbete eta Xalba Ramirezen eskutik.
Horren ostean iritsiko da eguneko unerik berezienetako bat, Koloreen babeslekua dokumentala estreinatuko baitute, Iratxe Beldarrain sortzaile laudioarrak Jaber Thabet irakasle palestinarrarekin batera eginikoa. Kontzertuekin emango diote agurra egunari, Barrrk eta Not taldeekin.
