Zeresana eman dute Aiaraldeko txirrindulariek asteburu honetan Espainiako Tarancon udalerrian jokatutako Espainiako Ziklokross Txapelketan. Lehen postua erdietsi dute Mirari Gotxi eta Iñaki Carrok Junior eta Master 40 kategorietan, hurrenez hurren.
Espainiako Txirrindularitza Federaziotik aipatu dute Gotxirena izan dela txapelketako lasterketa "polit eta lehiatuenetako" bat, kirolari amurrioarrak lasterketari "buelta ikusgarria" eman diola nabarmenduta. Izan ere, Gotxik erorketa pairatu du beste bi parte hartzailerekin batera, baina horren ostean aukera izan du bere erritmoa "apurka apurka ezartzeko", helmugara bera bakarrik iristea lortuz, "nabarmen emozionatuta".
Carrok, bere aldetik, Isaac Suarez munduko txapelduna izan du aurkari zuzen. Azken honek bi erorketa pairatu ditu izotzaren ondorioz, eta horrek abagunea eman zion aiaraldearrari 25 segundu inguruko tartea lortzeko.
Hain zuzen, muturreko tenperaturek markatutako norgehiagoka izan da Taranconekoa, eta txirrindulariek izotzari zein 0 graduko giroari egin behar izan diote aurre, norgehiagokak eta aiaraldearren garaipenak are epikoagoak bilakatuz.
Azken garaipen honekin, euren ibilbide oparoetako palmaresa aberasten jarraitzen dute bi txirrindulariek. Biek lortu zuten euren kategorietako Euskadiko ziklokros txapeldun bilakatzea 2025 amaieran, abenduaren 28an Seguran.