Uzta ona ekarri zuten atzo Aiaraldeko txirrindulariek Seguratik, han lehiatutako Euskadiko Ziklokros Txapelketan aritu baitziren. Hain zuzen, Mirari Gotxi onena izan zen junior kirolarien artean eta Iñaki Carro Master 40ko kategorian. Gaizka Pujana Iñaki Carrorekin batera igo zen podiumera, baina bigarren postuan.
Emaitzak ez dira guztiz ezustekoak izan. Berez, Mirari Gotxik oso denboraldi ona egin du aurten eta Movistar talde profesionalarekin entrenatzen hasi zuen 2025a. Nola ez, amurrioarra pozik dago. Segurara heldu baino lehen bazuen susmoa irabazleen artean egon ahal zela; baina, hala ere, bazekien zaila izango dela: "Txirrindulari gehiago daude lasterketan eta Frantziatik ere etorri zen baten bat".
Dena den, Gotxik bere erritmoa ezarri zuen lehen unetik eta azken bi itzuliak berak bakarrik egin zituen Junior kategoriako onena bilakatzeko. Orain, nahiz eta proba gehiago izan epe laburrean, bere erronka nagusia Taranconen jokoan egongo den Espainiako Txapelketa izango da, urtarrileko bigarren asteburuan.
Iñaki Carrok ere lehiaketa hori izango du buruan laster, atzo Seguran garaile izan ostean Master 40 kategorian. Carrok nagusitasuna erakutsi zuen eta bere atzean helmuga zeharkatu zuen hurrengoa Gaizka Pujana laudioarra izan zen. Biek ezagutzen zuten aurretik garaipenaren zaporea; Carrok Espainiako Txapelketa irabazi zuen 2023an eta Europakoa iaz eta Pujanaren kasuan, iaz berea izan zen Euskadiko lehen postua.