Osasun arlo guztiak gizon zuriaren ikuspegitik landu ditu zientziak historikoki, eta emakumea, eremu horretan ere, bigarren maila batean geratu da. Hala uste du Andrea Velasco nutrizio adituak, eta gehitu du horrek gaiari buruzko ezjakintasuna eta estigma sorrarazi dituela gizartean.
Testuinguru horretan alea jartzera dator “Osasuna eta elikadura, ikuspegi feministatik” zikloa, Bor-bor Aiaraldeko Feminismo Elkarteak eta Elikadura Faktoriak elkarlanean antolatua.
3 saio, 3 gai ezberdin
Zikloak hiru saio izango ditu eta horietako bakoitzean gai nagusi bat jarriko da mahaigainean: giza papilomaren birusa, hilerokoaren zikloa eta menopausia. Guztiak ere emakumeen bizitzetan eta gorputzetan eragin zuzena duten arren, oraindik ere tabu, estigma eta beldurrez inguratuta dauden gaiak dira, Velascoren arabera.
Zikloak hiru saio izango ditu eta horietako bakoitzean gai nagusi bat jarriko da mahaigainean: giza papilomaren birusa, hilerokoaren zikloa eta menopausia
Gaiok ikuspegi feministatik lantzearen garrantzia ere nabarmendu dute antolatzaileek. Izan ere, azaldu dutenez, osasuna ez dute modu berean bizi gizonek, emakumeek edo genero disidenteek. Emakumeek, oro har, zaintza-lan gehiago hartzen dituzte beregain, lan baldintza prekarioagoak izaten dituzte eta kalitatezko denbora libre gutxiago dute norberaren zaintzarako. Horrek guztiak eragin zuzena du elikaduran, atsedenean, kirol jardueran eta harreman sozialetan, eta, ondorioz, osasunean.
GPBren infekzioaren kasuan, birusa promiskuitatearekin lotzeak lotsa eta erru sentimenduak eragin ohi ditu. Tailerrean, birusaren funtzionamendua, Osakidetzaren baheketa-probak eta immunitate-sistema indartzeko gakoak landuko dira, besteak beste, elikaduraren bidez.
Hilerokoaren zikloa bizi-seinale gisa ulertzea izango da bigarren saioaren ardatza. Zikloan gertatzen diren aldaketek gorputzak bidaltzen dituen mezuak dira, dena ondo ez dabilen seinale. Elikadurak, hala nola energia nahikoa izateak edo nutriente jakinek funtsezko zeregina dute beharrezkoa den oreka mantentzeko.
Azkenenik, martxoaren 5ean, menopausiak gorputzetan duen eraginaz arituko dira parte hartzaileak. Tailerrean, hormona-aldaketek gorputzean duten eragina eta elikaduraren bidez nola lagundu daitekeen aztertuko da: isoflabonak, kaltzioa eta bestelako elikagai gakoak izango dira hizpide.
Horrekin batera, menopausiaren kutsu negatiboa deseraikitzeko lanketa egingo da. Izan ere, nahiz eta Mendebaldeko herrialdeetan garai honetan emakumeak balio soziala galtzen duen sinesmena handia bada ere, Andrea Velascok beste kultura batzuetako ideiak ekarriko ditu gurera. Esaterako, azaldu du Japonen koneki terminoa erabiltzen dela menopausia izendatzeko, zeinak “aldaketa edo berritze urteak” esan nahi duen, eta jakinduriaren garaitzat hartzen dela.
Liburuetatik sukaldera salto
Saio guztiak izaera teoriko-praktikoa izango dute. Lehenengo zatian eduki teorikoak landuko dira, eta bigarrenean, ikasitakoa praktikara eramango da, parte-hartzaileek errezeta bat edo bi prestatuko baitituzte. Tailerren izaera kontuan izanda, talde txikietara bideratzeko hautua egin dute antolatzaileek.
Gauzak hala, gehienez 12 lagun egongo dira saio bakoitzean eta espazio ez-mistoa izango da; emakume eta genero disidenteentzako, konfiantza giroa bermatzeko. Hitzordu guztiak euskaraz eta doan izango dira, Arabako Foru Aldundiaren eta Laia Eskolaren babesari esker.
Velascoren hitzetan, helburua argia da: informazioa partekatzea, hitza ematea eta gorputzean gertatzen zaiguna modu naturalean eta kolektiboan bizitzeko tresnak eskaintzea. Beldurrik eta lotsarik gabe, osasunari eta elikadurari bizitzan duten zentralitatea ematea xede.