Biharko deituta dagoen greba orokorrarekin bat egin du Aiaraldea Kooperatiba Elkarteak. Hori dela eta, elkartearen egoitza den Faktoria itxita egongo da egun osoan eta ildoek ez dute jardunik egingo.
Aiaraldea Komunikabidearena izango da salbuespen bakarra. Bertako kazetariek lan boluntarioa egingo dute grebaren jarraipena egiteko, eta horretara baino ez dira mugatuko.
Grebaren nondik norakoak
Greba orokorra deitu dute martxoaren 17rako Hego Euskal Herriko gehiengo sindikalak (ELA, LAB, Steilas, Etxalde eta Hiruk). 1.500 euroko gutxieneko soldata propioa aldarrikatzea da protestaren helburu nagusia, “Soldatak hobetu aberastasuna banatzeko” lemapean.
Iragan martxoaren 7an egin zuten Amurrioko Refor enpresaldean lanuztera batzeko agerraldia, Tubos Reunidoseko, Maderas de Llodioko, jantokietako eta beste enpresa eta sektore batzuetako langileekin.
Bertan aldarrikatu zuten eskualdean "arrazoiak soberan" daudela deialdira atxikitzeko. Hain zuzen ere, "bizitzaren garestitzea" da zergatietako bat. Agerraldian salatu zutenez, “geroz eta gehiago, bizitzaren garestitzea errealitate gordin bilakatzen da auzokide askorentzat. Enpresarien mozkinek gora egiten duten bitartean, gure soldatak ez dira neurri berdinean handitzen. Eta inflazioaren krisiak erosahalmena galtzea ekarri du azken urteetan”.
Horrez gain, Aiaraldeko "industria ehuna kolokan" dagoen garai honetan, biharko grebaren premia gutxieneko soldata propioa aldarrikatzeaz harago doa eskualdean. Maderas de Llodion eta Tubos Reunidosen mahai gainean dauden kaleratze kolektiboak jarri zituzten horren adibide gisa.
Egun osoko egitaraua
Goizeko bostetan hasiko dira grebari lotutako ekintzak eskualdean. Ordu horretan, piketeak hasiko dituzte Laudio eta Amurrioko industriaguneetan, Telefonicatik eta Lateorro aparkalekutik abiatuta, hurrenez hurren. Eguerdian Gasteizko manifestaziora joateko deia egin dute, eta arratsaldean eskualdeko mobilizazioa egingo dute Laudion, 18:00etan Lamuza plazatik abiatuta.
