Arrastariako bizilagunek ez diote hutsik egin 1639tik etenik gabe ospatu duten tradizioari. Ohitura legez, Antiguako Amaren Santutegiraino segizioa egin dute Delika, Aloria, Artomaña eta Tertangako bizilagunek.
Ama birjinari botoak berritu ostean, Santutegiko atarian entradillak dantzatu dituzte lau herrietako gazteek. Jarraian, erromesaldian jaitsi dira hirira.
Hiriko makila Arrastariako bizilagunen esku
Hiriko sarreran zain zuten Iker Santocildes alkatea, eta honek Urduñako aginte makila eskaini dio Alberto Quincoces Tertangako alkateari, Arrastariako bizilagun guztien ordezkari. Aginte makilak trukatuta, La Posada tabernaraino egin dute bidea, eta bertako balkoitik hartu dute hitza agintariek.
Arrastariako bizilagunen aldarrikapen bati jarri dio ahotsa Quincocesek balkoitik eskainitako hitzartzean. Delika, Aloria, Artomaña eta Tertangako adineko pertsonek Urduñako Nagusien Egoitzan artatuak izateko eskubidea aldarrikatu du, "gure nagusiak zaindu, aurreko belaunaldiek egindako lana aitortu eta erroak gal ez ditzaten".
Argazkiak: Aimar Gutierrez Bidarte