Azkenaldian ohikoa izaten ari den bezala, atzo ere gorabeherak egon ziren Renfeko C3 linean. Aiaraldea Bilborekin eta Hego Uribe eskualdearekin lotzen dituen tren zerbitzuan trenek atzerapenak izan zituzten, horietako zenbait bertan behera gelditu ziren eta, gainera, Ollargan eta Abando arteko tartea funtzionamenduz kanpo egon zen arratsaldeko tarte batez. Geltokietako pantaila batzuk ere hondatu ziren.
Egoera salatzeko oharra zabaldu du EH Bilduk eta adierazi du Aldirietako C3 linearen egoera larria dela eta atzoko gertakaria ezin dela isolatutzat jo, baizik eta lineak "aspaldidanik dituen egiturazko arazoen beste adibide" bat dela.
Trena "oinarrizko zerbitzu publikoa" dela gogorarazi du eta horregatik "onartezina" dela "herritarren mugikortasunari eta bizi-kalitateari zuzenean eragiten dieten gorabeherak errepikatzen jarraitzea".
Gaiari lotutako agerraldia egin zuten aurreko astean Laudio eta Arrigorriagako alkateek zerbitzu "moderno, seguru, irisgarri eta duina" eskatzeko eta hobekuntza zehatzak plazaratzeko.
Renferi eta Adifi eskatu diete erantzukizuna beren gain hartzeko eta modu koordinatuan jarduteko.
Batzar Nagusietan, Eusko Legebiltzarrean eta Diputatuen Kongresuan, ekimen instituzionalak sustatuko dituztela ere iragarri dute, eta gizarte-mobilizaziorako dinamikak ere jarriko dituzte abian.