Uztailaren 24 eta 25ean bisitatuko du Urmugaren Urtanta ekimenak Aiaraldea. Lehen egunean Artomaña eta Delikatik arituko da mendizaletasuna eta musika uztartzen dituen egitasmo ibiltaria, bidean hainbat kontzertu eskainita: 12:00etan piano eta bibolin saioa egongo da eta 18:00etan Et Incarnatus Orkestra eta Mikel Urdangarinek joko dute.
Orkestra horrek berriro joko du 20:00etan, Artomaña Txakolindegian eskainiko duten itxiera emanaldian. Antolatzaileek aurreratu dutenez, "ekimen oso berezia" egingo dute, Eusko Jaurlaritzaren sorreraren 90. urteurrena dela eta. Izan ere, nabarmendu dutenez, Jaurlaritza bera euskal kulturaren bultzatzaile nagusietako bat izan zen bere sorreran, Eresoinka bezalako proiektuak sustatuta.
Hurrengo eguneko ekimena ere izango da berezia, Kepa Junkera izango baita ohorezko gonbidatua. Tokiko musikariak izango dira protagonista egun horretako kontzertuan, Erauntsi Dantza Taldea, Lander Txato, Aitor Aspuru, Uxue Kerejeta eta Gorka Hermosa igoko baitira oholtzara, Et Incarnatus-eko kideekin eta Urduñako txistulari eta trikitilariekin batera.
Horrez gain, Montes Solidarioseko kideek ere hartuko dute parte mendian barrena egingo den ibilbidean, mugikortasun mugatua duten parte hartzaileei laguntzen.
Nabarmendu dute Urduña muga-hiria dela, eta horrek baduela sinbolismoa aurtengo edizioan, migrazioen errealitateak jendarteratzea izango baita helburua.
Bi ekimenetara joateko sarrerak salgai daude dagoeneko Urmugaren webgunean.
Migrazioaren errealitateak jendarteratzea helburu
Gaur goizean egin dute Urtanta egitasmoaren aurkezpena Urduñako Udaletxean. Bertan nabarmendu dutenez, bi arrazoi nagusi egon dira ekimenaren bi etapa eskualdean egiteko.
Alde batetik, Urmugako kideek gogora ekarri dute iazko edizioan harrera beroa egin zietela hirian.
Bestetik, nabarmendu dute Urduña muga-hiria dela, eta horrek baduela sinbolismoa aurtengo edizioan, migrazioen errealitateak jendarteratzea izango baita helburua. Hain zuzen, Kanariar Uharteetan abiatu zuten ekimena maiatzean, eta Bidasoan egingo dute bigarren etapa uztailaren 18an, "muga zeharkatzen bizitza galtzen duten migratzaile guztien memorian".