Iñaki Ullibarri Arabako EH Bilduko batzarkidea Aiaraldea Komunikabidearekin jarri da harremanetan gaur azaltzeko koalizioa ez dagoela ados Arabako Foru Aldundiko gobernuak aurkeztu duen proposaremenarekin AP-68 kudeatzeko.
Foru Gobernu Kontseiluak asteartean onartu zuen arau proposamena AP-68 kudeatzeko, azaroaren 11n publiko bilakatuko baita eta zabaldutako oharrean adostasun politiko zabala zegoela aipatu arren, Ullibarrik aurreratu du EH Bildu aztertzen ari dela araua eta talka puntuak topatu dituztela jadanik.
Batzarkideak azaldu du aurreko legealdian egon zela adostasuna gaitasun handiko ponentziaren inguruan, baina ez astearteko proposamenari lotuta.
Aiaraldearrek Gasteizera joateko ordaindu dute, beste arabarrek ez bezala
Detektatu duten desadostasunetako bat izan da ez dela konpontzen Aiaraldeko herritar arabarrekin dagoen "zor historikoa". Izan ere, eskualdeko herritarrek ordaindu behar izan dute autopista erabiltzeko Gasteizko bidean eta horrek proposamen berezia beharko luke, EH Bilduren ustez.
Detektatu duten desadostasunetako bat izan da ez dela konpontzen Aiaraldeko herritar arabarrekin dagoen "zor historikoa".
"Oso berandu eta anbizio gabe"
Edonola ere, arestiko arrazoi hori ez da EH Bilduk argudiatu duen desadostasun handiena. Izan ere, Ullibarrik kritikatu du izugarri berandu lantzen ari dela foru araua: "Azaroaren 11n bilakatuko da AP-68 publiko eta irailean ekingo diogu eztabaidatzeari osoko bilkuran. PPk ziurrenik beste osoko bilkura bat eskatuko du arauari zuzenketa osoa egingo baitio, eta guk zuzenketa partziala ere aurkeztuko dugu. Horrez gain, tarifen prezioak ere eztabaidatu beharko ditugu. Hortaz, urriaren amaieran bukatu daiteke prozesua eta azaroan indarrean jarri. Mugan egongo gara".
Halaber, EAJk eta PSE-EEk proposatutako proiektuari anbizioa falta zaiola azpimarratu du eta ezer gutxi aurreratu nahi izan badu ere, iradoki du garraiolari arabar txikientzako neurriak falta direla, baita mugikortasun jasangarria sustatzekoak edo tarifa laua sortzea, Gipuzkoan bezala.