Aurreko asteko astelehenetik, uztailaren 27tik, egokitutako hiru tren daude martxan Urduña eta Bilbo lotzen dituen C-3 linean. Gipuzkoatik ekarritako 447 modeloko ibilgailuak dira eta erdiko bagoiko ate zentralean arrapala dute eskailerak beharrean. Iragan astean, Maria Luisa Goikoetxea urduñarrak aurreratu zuen trenak irisgarriak izateak ez duela esan nahi zerbitzu osoa ere badenik, ez baitaude geltoki guztien altuerara egokiturik.
Araudiak zehazten du nasa eta trenaren arteko distantziak ezin dituela 7,5 zentrimetroak gainditu, eta desnibela ezin daitekeela 5 zentimetro baino gehiagokoa izan. Fekoor elkarteak geltokiz geltoki neurtu du ea segurua den mugikortasun murriztua duten pertsonei bideratutako atetik gurpildun aulkian edo beste baliabide tekniko batzuen laguntzaz trenetik igo eta jaistea eta C-3 lineako irisgarritasun mapa osatu du.
Kolore berdea eman diete trenetik modu irisgarri eta seguruan igo eta jaitsi daitekeen geltoki horiei, laranja araudia gutxigatik gainditzen dutenei edo zailtasunak sor ditzaketen horiei eta gorria arriskutsuak eta ez irisgarriak diren horiei.
Urduñatik Bilboko noranzko nasetan, horrela kategorizatu dituzte:
- Berdeak, irisgarriak: Urduña, Amurrio, Amurrio Iparralde, Laudio, Areta, Arakaldo, Basauri, Bidebieta-Basauri, Miribilla, Abando.
- Laranjak, zalantzazkoak: Arrankudiaga, Arrigorriaga, La Peña.
- Gorriak, arriskutsuak: Iñarratxu, Salbio, Luiaondo, Laudioko Santa Kurutze, Arbide, Bakiola, Ugao, Abaroa San Miguel, Ollargan.
Bilbotik Urduñako noranzkoan, ordea, nasa aldatzen denez, honelakoa da sailkapena:
- Berdeak, irisgarriak: Abando, Miribilla, La Peña, Bidebieta-Basauri, Arrigorriaga, Arbide, Urduña.
- Laranjak, zalantzazkoak: Bakiola, Arrankudiaga, Areta, Laudio, Amurrio Iparralde, Amurrio.
- Gorriak, arriskutsuak: Ollargan, Abaroa-San Miguel, Basauri, Ugao, Arakaldo, Laudioko Santa Kurutze, Luiaondo, Salbio, Iñarratxu.
Gauzak horrela, Fekoor elkarteak aholkatu die mugikortasun arazoak dituzten erabiltzaileei ordutegia begiratzeko unean Renferen webgunean "Irisgarriak" aukera aktibatzea, jakiteko zein zerbitzu den egokia euren beharretarako, bai trenaren zein geltokiaren aldetik. Renferen arreta telefonoak ere erabili daitezke horretarako: 944 879 256 / 912 320 320.