Pasa den astean unitateren bat ikusgai egon bazen ere C-3 linean, antza gaur arte ez dituzte funtzionamenduan jarri Renfeko tren irisgarriak. Bagoi horiek Gipuzkoatik heldu dira, Adifek trafikoa eten behar izan duelako han, Abiadura Handiko Trena egiteko obrekin jarraitzeko.
Edonola ere, Maria Luisa Goikoetxeak, irisgarritasunaren aldeko ekintzaile urduñarrak, Fekoor elkartearen informazioa jaso ondoren, jakinarazi du horrek ez duela esan nahi Bilbo eta Urduña lotzen duen zerbitzu osoa irisgarri izango denik, arrazoi ugari direla medio.
Hasteko, ekarritako unitateek ez dituztelako orain arte egon diren trenak ordezkatuko. Hau da, ohiko trenek ere jarraituko dute funtzionamenduan.
Horrez gain, geltoki guztiak ez daude prestatuta trenaren ezaugarrietarako eta, ondorioz, nahiz eta plataforma bat izan, ez da geratzen nasaren altueran geltoki orotan.
Gauzak horrela, Fekoor elkarteak aholkatu die mugikortasun arazoak dituzten erabiltzaileei ordutegia begiratzeko unean Renfeko webgunean "Irisgarri" aukera aktibatzea, jakiteko zein zerbitzu den egokia euren beharretarako, bai trenaren zein geltokiaren aldetik.
Aipatu beharra dago, berez, unitate mota ezberdinak probatu dituztela Renfeko Aldirietan, Bartzelonatik ekarritakoak adibidez, baina duela urtebete baliatu zuten Gipuzkoako unitate bat eta Maria Luisa Goikoetxea berak parte hartu zuen saio horietan.