Ertzaintzarekin bizitako hizkuntza zapalkuntza kasu baten berri eman du Aiaraldeko Euskalgintza Kontseiluak. Hizkuntzaren biziberritzearen aldeko eragileak azaldu duenez, egoera pairatu zuen herritarrak Elebiden jarri du salaketa, Hizkuntza Eskubideak Bermatzeko Eusko Jaurlaritzaren Zerbitzuan.
Azaldu dutenez, azaroaren 11n jazo zen gertaera, 9:30ak aldera Ertzaintzaren kontrol batean, Luiandotik Laudiorako noranzkoan. Herritarrak kontatutakoaren arabera, autoan zihoala geldiarazi zuten, beste lau lagunekin batera. Ertzaintzak bi kontrol muntatu zituen goiz hartan Luiaondon, greba orokorraren testuinguruan.
Kontrolaren hasieran, agente batek gaztelaniaz eskatu zion NANa. Herritarrak, ordea, euskaraz artatua izan nahi zuela adierazi zion. Horren aurrean, agenteak honako hau erantzun zion: “Yo te hablo en este idioma, y tú me contestas en el que quieras, y te he dicho que me des el DNI”.
Herritarrak bere hizkuntza eskubideak errespetatzeko eskatu zion, baina agenteak ez zuela eskubiderik urratzen erantzun zion. Egoeraren aurrean, agente haren identifikazio zenbakia eskatu zuen herritarrak, baina honek zuen eman.
Une horretan, aurpegia estali gabe zuen eta euskaraz zekien beste agente bat hurbildu zen, eta herritarrak hari eman zion NANa. Ondoren, autotik ateratzeko agindu zioten, eta lehen miaketa egin zioten kanpoan.
Identifikazio zenbakia eskatu, baina erantzunik ez
Miaketaren ostean, operatiboko arduraduna gerturatu zen, aurpegia estali gabe zuen eta euskaraz egin zion herritarrari. Hark gertatutakoa azaldu zion, eta kexa aurkeztu nahi zuela adierazi zion, berriro ere aurretik izandako agentearen identifikazio zenbakia eskatuz.
Arduradunak, ordea, ez zion zenbakia eman. Herritarrak agentea identifikatzeko eskatu zion, baina ez zioten horretarako aukerarik eman. Herritarrak azaldu duenez, dozena bat ertzain inguruko operatiboan bi agente baino ez zeuden aurpegia estali gabe, eta haietako bat lehenago euskaraz artatu zuen agentea zen.
Gertakari horien ondoren, bigarren aldiz miatu zuten.
"Bigarren mailako herritar bezala tratatu ninduten, mespretxu osoz"
Herritarrak jarrera eta tratu txarra salatu ditu, eta gertatutakoa euskararen aurkako diskriminazio gisa bizi izan duela adierazi du: “Bigarren mailako herritar bezala tratatu ninduten, mespretxu osoz”. Era berean, egoera honek ondorio administratiboak ekar ditzakeela ohartarazi du: “Ez ninduke harrituko euskaldun gehiagori gertatu bezala, euskaraz artatua izatea eskatzeagatik, oinarririk gabeko isun administratiboren bat jartzeko saiakera egitea”.
Ertzaintzaren jokabidea “lotsagarritzat” jo du. Bereziki ulergaitza iruditzen zaio egoera hori gaur egun gertatzea, Ertzaintzan sartzeko adin mugak eta hezkuntza sistemako hizkuntza ereduek euskararen ezagutza zabaltzeko aukera eman duten testuinguruan.
Herritarraren ustez, onartezina da administrazio batek herritarren hizkuntza eskubideak horrela baztertzea. Izan ere, herritarrek euskaraz egiteko eta euskaraz artatuak izateko duten eskubidea errespetatua izan behar dela aldarrikatu du.