.jpg)
“Ekologia industrialari” buruzko ikerketa bat egin du Amurrioko Udalak. Ekoizpen eredu hori sustatu eta ezartzeko herriko enpresekin egin daitekeen elkarlana aztertu dute. Ikerketak ondorioztatu du interesgarria izango litzatekeela herriko enpresari eta jabeen elkarte bat sortzea, “enpresa-guneen kudeaketan” lagundu dezan. Gune horiei begirako udal-plan bat garatzea ere aurreikusten du ikerketak, elkarlan “publiko-pribatua” sustatuaz.
“Ekopoligonoen” eredura hurbiltzeko pausoak ematea da udalaren asmoa. “Baliabideak modu eraginkorrean baliatuko dituen ekonomia baterantz jo nahi dugu, garatzen gabiltzan ingurugiro politikei jarraipena emateko”. Amurrio EKOiztu egitasmoa sortu zuen udalak horretarako, eta proiektu horren baitako beste pauso bat izan da orain aurkeztutako ikerketa.
Diagnostikoa plazaratu zuten iaz, herriko enpresek sortzen duten kutsadurari buruzkoa, eta esperientzia pilotua ere jarri zuten abian hondakinak batera kudeatzeko, Aldaiturriaga eta Maskuribai industrialdeetan.
“Kudeaketa eredu propioa”
“Amurrioko enpresa-guneetarako kudeaketa-eredu propioa garatu dugu”, adierazi du Josune Irabien alkateak, eta gaineratu du “enpresa-komunitatearen erakundetzea” bultzatzea dela “epe motzera” jarri duten helburua. “Gainera, hemendik legealdia bukatzen den arte, plan bat garatuko dugu industria-guneak modernizatzeko, finantzaketa publiko eta pribatua zehazteko eta udalak testuinguru berri horretan izango duen rola definitzeko”.
