Praktiketako prestakuntza-programa bat jarri du abian Amurrioko Udalak, “gazteen artean enplegua sustatzeko”. Hilean 800 euroko diru-laguntza emango zaio programan parte hartzen duen gazte bakoitzari, aurtengo azaroaren 1etik 2018ko apirilaren 28ra
Udaletik azaldu dute prestakuntza programa hori Amurrio Bidean sozietate publikoak kudeatzen duen Hazilan proiektuari lotua dagoela. “2016an egin zen Hazilan proiektuaren lehen edizioa, eta 9 gaztek parte hartu zuten”, azaldu dute tokiko erakundetik, “2017an beste edizio bat abiatuko da, eta parte-hartzaileei zeharkako konpetentziak eta konpetentzia teknikoak irakatsiko zaizkie, ondoren enpresetan praktikak egin ditzaten edo planteaturiko erronkei erantzun diezaieten”.
50.000 euroko partida
Horta gain, Udaletik gogorarazi dute 50.000 euroko partida sortu dutela aurtengo aurrekontuetan, “Gazteen Ebplegu Plana” sortzeko. “Plan horren bitartez, ikastaroak egingo dira eta enpresetan trebatzeko bekak emango dira, bideragarritasun-planak egitearekin bat”, Estíbaliz Sasiain zinegotziaren hitzetan.
Betebeharrak
Hauek dira izena emateko bete beharreko baldintzak:
a. Amurrioko udal-barrutian egotea erroldatuta, gutxienez duela sei hilabetetik.
b. Unibertsitateko lizentziatura, gradua edo diplomatura eta/edo goi-mailako prestakuntza-zikloa bukatua izatea.
c. Helburu berbera edo antzekoa duen beste beka edo laguntzarik ez jasotzea aldi berean.
d. Ez egitea lan ordaindurik beka jasotzen ari den aldian, edo, lanean ari bada, lan hori ez izatea astean 20 ordutik gorakoa.
e. Amurrio Bideanek (Amurrioko Udaleko tokiko garapenerako sozietatea) antolaturiko eta Europako Gizarte Funtsak kofinantzaturiko Hazilan prestakuntza-ekintzan parte hartzea edo parte hartu izana beka hauek iragarri diren urtean. Bekaren bat hutsik gelditzen bada, aurreko deialdian edo deialdietan Hazilan prestakuntza-ekintzan parte hartu duten pertsonek eskuratu ahal izango dute.
f. 1974ko urtarrilaren 1a baino geroago jaio izana.
